نجلاء بدر: مفيش حاجة اسمها دور الست ودور الراجل.. والعلاقة بينهما قائمة على التكافؤ

كتبت: ياسمين ياسر

انتقدت الفنانة نجلاء بدر، الآراء المتحيزة لأح الطرفين الزوج والزوجة، مشيرة إلى أن ما يحدث عبث وجهل، وأن العلاقات الزوجية قائمة على المودة والرحمة من قبل الطرفين.

العلاقات الزوجية لا تنجح من قبل فرد واحد

وأضافت نجلاء بدر في تصريح خاص: اللي بيحصل ده عبث، العلاقات الزوجية مش بتنجح من فرد واحد، أنا مش مع بند هو ولا هي، أنا ست متجوزة لو جوزي ما قدرنيش مش هديله، ولو أنا ماقدرتوش مش هيسعدني، عاوزة دلع دلعي عاوز حب حبي ونفس الحكاية بالنسبة للراجل عاوز دلع يدلع عاوز حب يدي.

العلاقة بين الرجل والست قائمة على التكافؤ

وأكدت أن العلاقة بين الرجل والست قائمة على التكافؤ قائلة: هي علاقة متكافئة مفيش حاجة اسمها مين المفرض يعمل ومين لأ.. ساعات الزوج بيقوم بمهام المرأة، لو مراته تعبانة أو مشغولة أو نفسيتها تعبانة، ولو شالها هتشيله يوم ما تقوم على رجيلها، وهو نفس الحكاية أنا أحيانًا بقوم بمهامه وبقف مع الميكانيكي لو مشغول أو عنده اجتماع أو تعبان، لو قعدنا نفكر مين المفروض يعمل إيه تبقى علاقة فشلة وناس فشلة.

وأضافت: القرآن بيقول المودة والرحمة للطرفين مش للست أو الراجل يعني علاقة مبينة على المودة للطرفين، ومفيش حاجة اسمها إيه دور الست والراجل، لكن اللي بيتقال عبث وبيطلعوا أجيال جاهلة دينيًا وأسريًا وأنا مش مع الجانب ده أو ده، أنا قافلة مع نفسي وبحافظ على بيتي وأنتم بره حاربوا في بعض.

بقينا بنصنع جهل

وأضافت: هي مش حرب، هنجيب عيال إزاي لو هي حرب وهنربيهم على إيه، ده جهل بقينا بنصنعه، أنا مضيقة وبشفق على الجمهور اللي بيستمع للعبث دا، راعوا إن فيه أطفال لسه فكرها ما تكونش وخبراتها ما تكونتش، والله يكون في عون الأسر اللي بتحارب الجهل ده.. وكل أب وأم بقى دوره يبعد الضوضاء دي عن أولاده علشان يطلعوا أسوياء.

وأردفت: أنا أبويا شال عني كتير وأمي غسلت أطباقي وأخويا كوى لي هدومي، دي الحياة الطبيعية المصرية الأسرية الاسلامية اللي فيها مودة ورحمة عن العلاقة الزوجية للطرفين.

وأشارت نجلاء بدر إلى أن مسلسلها الجديد حكاة روليت، جاء في ظروف مواكبة لما يحدث، قائلة: المسلسل جه في ظروف مواكبة للتريندات، والطلاق بين الشخصية التي جسدتها نجلاء بدر وزوجها في العمل نضال الشافعي، كان بسبب غياب الصراحة لأنها عنصر أساسي لو كانت صارحته أو هو صراحها كانت المشكلة اتحلت، لكن ده عمل فجوة بينهم.