باسم سمرة: مفيش حاجة اسمها بابا المجال ونمبر وان.. والمفروض الفنان ميتكلمش عن الإيرادات

الفنان باسم سمرة

كشف الفنان باسم سمرة رأيه في المنافسة بين الأعمال في السينما التي طرحت مؤخرًا، إلى جانب تعاونه مع أمير كرارة في فيلم البعبع والذي طرح في السينمات الفترة الماضية.

وقال باسم سمرة في تصريحات صحفية: المنافسة بين الأعمال في السينما جيدة، وكل زمالينا اللي اشتغلت معاهم رائعين زي أمير كرارة وياسمين صبري والمخرج حسين المنباوي لإنه مخرج عظيم.

وعن مقاييس نجاح الفيلم قال باسم سمرة: نجاح الفيلم بيعتمد على مدى استمراريته؛ فالعمل الفني اللي بيعيش هو اللي بينجح، ومقاييس النجاح بتعتمد أيضا على الورق والمخرج والتصوير وكاست العمل وإيه العمل اللي بيطرح وبنقدم من خلاله إيه وإيه الرسالة اللي هنقدمها من خلاله.

الإيرادات ليست دليلًا على نجاح الفيلم 

وأكد باسم سمرة، أن الإيرادات ليست دليلا على نجاح الفيلم مستنكرًا سعادة فنان بارتفاع إيرادات فيلمه، إذ قال: الفنان مالوش دعوة بالإيرادات لإني ممكن أعمل فيلم مهم وياخد جوائز ولكن ميحققش إيرادات في السوق وميكونش على مستوى فكر الناس والفنان المفروض متتكلمش على الإيرادات المنتج هو اللي بيتكلم. 

وأضاف باسم سمرة: مفيش حد بابا المجال ولا نمبر وان وإلا كلنا كنا هنغرق.. كل فنان له طعم وجمهور، ومينفعش الفنان يقول أنا بجيب أعلى إيرادات لإن الجمهور بيختنار وبيقول وبيدي اللقب مش إحنا اللي هندي ألقاب لنفسنا ده غلط.

وأردف: أنا واخد حقي في المجال الحمد لله، وعاوز أقدم أعمال مميزة ونبسط الناس ونفيدها ونسيب أثر طيب، وبحب أقدم أدوار متنوعة ومختلفة ولازم أكون أنا كمان مبسوط لإني لو مش مبسوط ومرتاح مش هعرف أطلع شغل طبعا ولا هبسطكوا أنتم بس.

وقال هادي الباجوري، في لقائه بـ برنامج تفاعلكم: الجمهور بيحب يتفرج على اللي اتعود عليه، ولما بتدي له حاجة جديدة بياخد فترة علشان يتعود عليه، ليه باسم سمرة ميبقاش ضابظ؟ علشان كان بيعمل أدوار بلطجي؟، وده مالوش دعوة بالموضوع والضابط في مصر اتعودنا عليه في المسلسلات أنه يكون له شكل معين زي أمير كرارة.

وتابع: أنا بحب أخرج عن المألوف، وباسم سمرة ممثل شاطر جدًا وفي البداية الجمهور كان مخطوف منه وبعد فترة شافوه بيعمل الدور مظبوط، وأنا شايف أنه ممثل شاطر جدًا أي دور هنديهوله هيعمله مظبوط.

وعن تفاصيل تحضيراته مع الفنان أحمد فهمي بطل مسلسل سفاح الجيزة، فعلق هادي الباجوري، قائلًا: أنا بحب أحضر كويس أوي مع الممثلين في الأول، وعملنا بروفة ترابيزة وقراءة عادية وبنقترح تفاصيل معينة، واتفقنا على الابتسامة وطريقة الكلام وتون الصوت وحركة الجسم والنظرة، دي كلها تفاصيل بتطلع لما تقرأ مع الممثل ودي بتبقى المفتاح، وساعات وقت التصوير بتفلت منه وبنرجعه.

كما تحدث هادي الباجوري، عن وجهة نظره في عدم مد حلقات مسلسل سفاح الجيزة عن 8 حلقات، قائلًا: وجهة نظري أن الموضوع يكون في أحداث طول الوقت ومتلحقيش تتنفسي، وعايز الجمهور يفكر معايا مش كل حاجة بالمعلقة، ولو إحنا بنتكلم على الراجل اللي مستوحى منه القصة هو بالفعل قتل 4، إحنا خليناه خطف كمان في المسلسل وده الدراما اللي بنزودها، ولو أكتر من 8 حلقات بالنسبة ليا هيبقى في ملل في العمل.