أحمد فؤاد سليم: المسلسلات ضارة لأنها بتعلم الكسل.. ويوسف شاهين قالي أنت ممثل مفضوح

الفنان أحمد فؤاد سليم

أقيمت قبل قليل، ندوة تكريم الفنان أحمد فؤاد سليم في دار الأوبرا المصرية، متحدثًا عن مشواره الفني على مدار السنوات الماضية، معبرًا عن رأيه فيما آل إليه الفن حاليًا بمصر.

وقال أحمد فؤاد سليم: الحياة نفسها لعبة، والطفل الصغير من البداية بيكتشف الحياة من خلال اللعب، والمسرح والفن معادل للحياة، إديني مسرح أعملك مجتمع عظيم دي مقولة، احنا بنطرح مشاكلنا سواء مسرح أو تلفزيون عشان نناقشها، إحنا بنطهر طول الوقت يعني بنحل مشاكلنا والعقل الغريزي ده يخلي الإنسان ينقذ نفسه، ولكن مع تطورات الحياة دلوقتي هذا العقل الواعي مش مطلوب في الزمن ده، ولكن لابد من السيطرة عليه.

وأضاف أحمد فؤاد سليم: الفن لعبة بنّاءة، أنا ليه بمثل دور في العمر ده؟ لأن عندي مساحة ما عايزة أوريهالك يمكن أنت مش شايفها يمكن بنوريلك الطريق، الفن مشاركة والإنسان قيمته في المشاركة، وإحنا دلوقتي رايحين على الذكاء الاصطناعي ده والتليفونات فتت المجتمع ومحتاجين نناقشها، دي قضايا زيها زي ارتفاع نسبة الطلاق في مصر.

وتابع: الفن ضرورة وكل المفكرين قالوا كده، احنا بنعرض مشاكلنا وقضايانا علشان نحلها، أنا في الحوار الوطني كنت بقول إن المسلسلات حالة ضارة؛ لأنها بتعلم الناس الكسل، الهمة راحت والعيل الصغير مبقاش يشيل الكوباية من مكانها علشان عارف إن في غيره هيشيله، إيقاع الحياة بقى مختلف، هل الفنانين عارفين الاختلاف ده؟ هل الفن بدأ يحاكي هذه الأشياء؟ لأ للأسف.

وأردف أحمد فؤاد سليم: يوسف شاهين قالي أنت ممثل مفضوح يعني أي انفعال بسيط بيبان على وشي، وقالي إقرأ قراءة رشيدة، والتمثيل الكلاسيكي فيه نسبة انفعال، والناس بقت تصطنع أشياء وكبرياء وده بسبب الفن للأسف، يعني الصوت العالي ده مش بطولة ما ممكن البطولة تكون في قلبك مش لازم الشكل المفتعل ده مش هيصدقك بعد شوية، يوسف شاهين علمني الدرس ده.

ومن جانبه، علق الفنان محمد رياض رئيس المهرجان القومي للمسرح المصري، على تكريم أحمد فؤاد سليم، خلال بيان صحفي قال فيه: أحمد فؤاد سليم من رجال المسرح الراسخين، وأحد فرسان المسرح القومي بأعماله التي قدمها على خشبة هذا المسرح العريق، والفنان الكبير أحمد فؤاد سليم هو من الذين أضافوا للمسرح المصري، ومن الممثلين المخضرمين في هذا المجال، وله سنوات طويلة من العطاء المسرحي لذلك يستحق التكريم.

أحمد فؤاد سليم

ولد الفنان أحمد فؤاد سليم، في 6 فبراير عام 1947، في أسرة من محافظة الشرقية، ودرس في المعهد العالي للفنون المسرحية، وبدأ مشواره الفني بمسرحية الصعايدة وصلوا عام 1989 من إخراج السيد راضي.

ثم شارك فى العديد من المسرحيات ومنها: قصة الموت، عرابي زعيم الفلاحين، رجال الله، السبنسة، الزير سالم، بيت في الهوا، دستور يا أسيادنا، وغيرهم.