باسم سمرة: لو اتعرض عليا دور السفاح كنت هرفض.. أنا مش شغال علشان أبسط الناس فقط

الفنان باسم سمرة

رد الفنان باسم سمرة على الانتقادات التي تعرضت لها الفنان داليا شوقي عن دورها في مسلسل سفاح الجيزة، إلى جانب استيائه من رأي البعض بأن شخصية سفاح الجيزة كانت ستكون الأنسب له عن دور الضابط الذي قدمه في المسلسل.

وقال باسم سمرة مدافعًا عن داليا شوقي: مش عارف ليه الهجوم على داليا شوقي كده هي ممثلة رائعة وعاملة شغل حلو وإن شاء الله تبقى أحلى ولكن الناس مستعجلة وبتعمل أحكام وفيه هجوم غير مبرر.

وأضاف باسم سمرة مستنكرًا: قالوا لي ليه أنت متعملش دور السفاح وكأنهم هما اللي هيختاروا لي الدور أو كأني أنا اللي بختار ومفيش مخرج ومؤلف، ولو أصلا الدور عرض عليا مكنتش هعمله طبعًا لإني مش حابه لإن في الوقت ده كنت بعمل دور شعبي في بابا المجال فمينفعش أعمل حاجة في نفس السكة.. أنا كمان عاوز أستمتع بدور مختلف، ومش شغال بس علشان أبسط الناس أنا كمان عاوز اتبسط.

وأشار باسم سمرة، إلى أن المسلسل أخذ مجهودًا كبيرًا على الرغم من أنه يتكون من 8 حلقات فقط ولكنه كان بمثابة 30 حلقة، مردفًا: الإخراج على أعلى مستوى وطاقم التمثيل كذلك ومعظم المشاهد كان التصوير فيها خارجي وده كان شيء صعب جدًا.

وقال هادي الباجوري، في لقائه بـ برنامج تفاعلكم: الجمهور بيحب يتفرج على اللي اتعود عليه، ولما بتدي له حاجة جديدة بياخد فترة علشان يتعود عليه، ليه باسم سمرة ميبقاش ضابظ؟ علشان كان بيعمل أدوار بلطجي؟، وده مالوش دعوة بالموضوع والضابط في مصر اتعودنا عليه في المسلسلات أنه يكون له شكل معين زي أمير كرارة.

وتابع: أنا بحب أخرج عن المألوف، وباسم سمرة ممثل شاطر جدًا وفي البداية الجمهور كان مخطوف منه وبعد فترة شافوه بيعمل الدور مظبوط، وأنا شايف أنه ممثل شاطر جدًا أي دور هنديهوله هيعمله مظبوط.

وعن تفاصيل تحضيراته مع الفنان أحمد فهمي بطل مسلسل سفاح الجيزة، فعلق هادي الباجوري، قائلًا: أنا بحب أحضر كويس أوي مع الممثلين في الأول، وعملنا بروفة ترابيزة وقراءة عادية وبنقترح تفاصيل معينة، واتفقنا على الابتسامة وطريقة الكلام وتون الصوت وحركة الجسم والنظرة، دي كلها تفاصيل بتطلع لما تقرأ مع الممثل ودي بتبقى المفتاح، وساعات وقت التصوير بتفلت منه وبنرجعه.

كما تحدث هادي الباجوري، عن وجهة نظره في عدم مد حلقات مسلسل سفاح الجيزة عن 8 حلقات، قائلًا: وجهة نظري أن الموضوع يكون في أحداث طول الوقت ومتلحقيش تتنفسي، وعايز الجمهور يفكر معايا مش كل حاجة بالمعلقة، ولو إحنا بنتكلم على الراجل اللي مستوحى منه القصة هو بالفعل قتل 4، إحنا خليناه خطف كمان في المسلسل وده الدراما اللي بنزودها، ولو أكتر من 8 حلقات بالنسبة ليا هيبقى في ملل في العمل.

أبطال مسلسل سفاح الجيزة

ويُشار إلى أن مسلسل سفاح الجيزة مأخوذ عن قصة حقيقية، وهو من بطولة أحمد فهمي الذي قدم دور سفاح الجيزة، إلى جانب كل من ركين سعيد وصلاح عبد الله وهايدي خليل وداليا شوقي وجيهان الشماشرجي، وعدد آخر من الفنانين وجسد باسم سمرة خلال أحداث المسلسل دور حازم الضابط، وحقق المسلسل نجاحًا كبيرًا ونال ردود فعل واسعة.