علا غانم عن الخلافات بين بطلات “أولاد حريم كريم”: بسمة كانت حمامة السلام

الفنانة علا غانم

ردت الفنانة علا غانم على الأخبار التي انتشرت عن وجود خلافات بينها وبين بطلات فيلم “أولاد حريم كريم” مؤكدة أن الكواليس بينهن كانت رائعة ولم يحدث بها أي مشكلة.

وقالت علا غانم خلال لقاء في برنامج “الراديو بيضحك” من تقديم فاطمة مصطفى عبر إذاعة “الراديو 9090”: “الدنيا كانت هادية في الكواليس خصوصا أننا بنعرف بعض من سنين، في كيميا ما بينا وبنسترجع ذكريات 18 سنة وقد إيه كان في فرق في تفكيرنا، وإحنا كبرنا 18 سنة ودا مخلينا نتخطى حاجات صغيرة كان ممكن توقفنا، عندنا استيعاب للأمور أكتر”.

وكشفت علا غانم دور بسمة في إنهاء أي خلاف وقالت: “هي مش حمامة سلام في الفيلم هي كانت حمامة سلام في جروب الواتساب، كنا ساعات نختلف في الآراء بعد انتهاء الفيلم هي هادية وطول الوقت بتهدينا، ياريت لو في كتير من بسمة في مصر الدنيا هتتغير”.

وعن فكرة وجود الفنانة بشرى في الفيلم كمنتجة وممثلة وإن تسبب هذا في أي شيء بينهن قالت علا غانم: “أنا بنسى أن بشرى منتجة، بشرى زميلة قبل ما تكون تبع الإنتاج، هي شخصية طول الوقت بتضحك وبتغني”.

فيلم “أولاد حريم كريم” بطولة مصطفى قمر، داليا البحيري، بسمة، علا غانم، خالد سرحان، عمرو عبد الجليل، وبشرى، بالإضافة إلى مجموعة من النجوم الشباب منهم تيام مصطفى قمر، رنا رئيس، وهنا داود، يوسف عمر، كريم كريم، وتأليف زينب عزيز وإخراج علي إدريس.

تصريحات طليق علا غانم

وقال طليق علا غانم خلال لقاء خاص: على طلعت على الميديا وعلى التلفزيونات، وقالت كلام كتير جدا عني، وأنا كنت ساكت مش بتكلم، وأنا جيت النهاردة عشان أقولكم الحقيقة اللي محدش يعرفها.

وتابع: موضوع الخلع عجبني في الأخر أن خلاص انفصلنا أنا وهي، أنما كموضوع خلع أساسي دا مكانش عاجبني جدا، لأني مش شايف أن الخلع للست أو للراجل كويس، وأنا فرقت شربات فعلا لأني كنت مبسوط جدا، لأنه حمل واتفك.

واستكمل: وأنا أخدت الكلام بتاعها اللي قالته مع بسمة وهبة، وقعدت افكر فيه، لقيت أن كلامها صحيح، لأنه كان مسلسل بنيته واستمرت فيه لمدة 17 سنة.

طليق علا غانم: اتضربت علقة حلوة من رجالتها

واضاف: وفي مرة اتضربت علقة حلوة واتكسرت من الناس بتوع علا غانم، وكان فيه توثيق للي حصل، أنا روحت للقسم بعتني على المستشفى، ووالدتها ضربتني بحديدة وعلا ضربتني بإزازة، وكان همها أنني مخشش الفيلا.

واستطرد: علا بالفعل اشترت الأرض بتاعت الفيلا سنة 2000 والله وأعلم مين اللي اشتراها، أنا اتجوزت علا 2005، وبنيت ليها فيلا في جمعية أحمد عرابي اللي على طريق الإسماعيلية، وكان عندي بيت في مساكن شيراتون، وبنيت ليها فيلا تانية في العين السخنة.

واختتم: وجات قالتلي ايه رأيك نبني في الأرض فيلا عشان شغلي وقريبة من مدينة الإنتاج، وبنينا حاجة صغيرة جدا، واستمر الموضوع دا لغاية ما الثورة حصلت، وجالنا تهديدات من جماعة قالت هنخطف أولاد علا ولازم تدفعلنا فدية 2 مليون دولار، واتقبض على الناس دول، وفي الوقت نفسه أنا قلقت على البنات ف سفرتهم أمريكا، وسفرنا وراهم، وفوجئت 2021 أنها عملت عقد بيع للفيلا بمبلغ 2 مليون.