الفنانة عزة بهاء
تحدثت الفنانة عزة بهاء عن حياتها الأسرية وزواجها من ثلاثة رجال، كما تحدثت عن خجلها من الجمهور والتقاط الصور معهم خلال مسيرتها الفنية، وذلك في تصريحات لبرنامج الستات.
أبرز تصريحات عزة بهاء في برنامج الستات
ـ أنا طبعي مش أحسن حاجة.. ودايما بعطي كتير وفجأة مش بلاقي النتيجة اللي أنا عايزاها.
ـ بختار الشخص على مقاييس معينة وبتكون غلط في الآخر.. واتجوزت مرة كانت بالعقل ومرة بالقلب.
ـ أول تجربة ليا كانت بالقلب وهو خالد بركات اللي كان متجوز نيللي.
ـ كل ما كنت بعمل مسلسل وينجح.. أقعد في البيت سنتين أو تلاتة.
ـ كنت مرتبطة بـ أمي بشكل غير طبيعي، ومكنتش متخيلة إني ممكن أسيبها لما أتجوز.
ـ أول جوازة ليا والدتي مكنتش موافقه عليه عشان كان متجوز قبل كده.. وإحساسها كان صح.
ـ تاني جوازة ليا قعدت معاه لـ 9 سنين وانفصلنا.. ويمكن لو كان بينا ولاد كنت كملت.
ـ المنتج عادل صادق رفعت قضية عليه وكسبتها لأنه ادعى عليا الزواج العرفي.
ـ معنديش ذكاء فني وكنت بتكسف اتصور مع الجمهور.
ـ أدهم أخويا هو ابني وقمت معاه بدور الأم كامل.. ودايما بقول إنه قلبي اللي ماشي على الأرض.
ـ زوجي التالت اتجوز عليا واكتشفت خيانته وجوازه يوم دفنته.. وقعد معايا سنتين ومات.
ونعرض لكم أبرز تصريحات عزة بهاء التلفزيونية:
– البيت خدني شوية كتير من 20 سنة، كنت بنزل أشتغل بس قليل.
– حصروني في شخصية الهانم لأني نجحت فيها الأول، وكنت مضايقة وبقول الفنان بيعرف يعمل كل الأدوار وأنا بعرف أعمل أدوار تانية.
– ابني كل حاجة في حياتي وهو عنده 28 سنة، هو دايمًا يقولي انتي حشرية، وأنا عايزة مصحلته وغصب عني بتابع كل تفاصيله، وطبعًا هو مش بيمسع كلامي كله ولكن لازم أتكلم وأوجه.
– ابني هو الراجل اللي في حياتي، بصدق، وعمري ما هخونه ولا هفكر أكون قلقانة منه ولا عايزة منه حاجة.
– حرمت أتجوز.
– كل ما أعمل مسلسل وينجح يطلع عليا شائعات وأعد سنتين في البيت، مش عارفة إيه السبب، وكنت بضايق وأنا صغيرة ولكني كنت بضيع وقتي.
– تزوجت مرتين، مرة توفى، والأخرى اطلقت.
– مخرج عرض عليا في فيلم انتقام امرأة ألبس قميص نوم عريان، ودا كان فيلم المقاولات الوحيد ليا، واتصدمت من الطلب ورفضت ولبست قميص نوم بـ كُم ومحتشم ولو كانوا رفضوا وأصروا على رأيهم كنت هعتذر عن العمل.
– لازم أعاين عروسة ابني بنفسي وبشوف أدق التفاصيل وبقول له عليها وبلفت نظره لنقاط محددة، ولكن هسيب ابني يختار عشان يتحمل مسئولية اختياره، وفي النهاية الحياة الزوجية فيها تنازلات.
– عايزة أجوز ابني واحدة طيبه وبتحبه بس.
– كنت برفض أتصور مع الجمهور لأني معرفهمش.. والمصور قال إن أنا ومنى زكي وقفنا حاله.
– طول ما ماما كانت موجودة أنا كنت بشتغل ومهتمة بشغلي أكتر، وبعد ما أتوفقت بدأت أقل في شغلي، لأنها كانت مشجعاني أكتر وبتقولي مترفضيش أي عمل حتى لو كان الدور مش عاجبك.
– مريت بـ أصعب وقت في حياتي بعد وفاة أمي لأني كنت مرتبطة بيها.
