تقرير: ياسمين ياسر
حل الفنان عماد رشاد ضيفًا على الإعلامي عمرو الليثي في برنامج واحد من الناس، وتحدث خلال الحلقة عن عدة موضوعات مختلفة، حيث روى تفاصيل العلاقة المميزة التي كانت تجمعه بالفنان الراحل فاروق الفيشاوي، بجانب الحديث عن علاقته بزوجته التي تتسم بالرومانسية.
أبرز تصريحات عماد رشاد
ويستعرض الأجواء، أبرز تصريحات عماد رشاد خلال الحلقة، والتي جاءت على النحو التالي:
-فاروق الفيشاوي له مكان في بيتي، وأنا ليا مكان في بيته، ولو الشهر 30 يوم يبقى هقابل فاروق 25 يوم.
-عندي 3 أحفاد، ومرتبط بيهم جدًا لكن بحاول أقلل من ارتباطي بيهم عشان خايف عليهم من الصدمة بعد رحيلي.
-صداقتي أنا وفاروق الفيشاوي عمرها 50 سنة، وهو صديق العمر وكل ذكرياتي معاه، وحياتي اتغيرت بعد فراقه.
-نصيحتي للشباب لما تعمل غلطة أوعى تعترف لمراتك، لأن الست الشرقية هتفضل فاكراها ليك.
-كتير من الزملاء زي إلهام شاهين قالت لي خلاص عدى 3 سنين على رحيل الفيشاوي، وحاولوا يخرجوني لكن معرفوش.
– حياة فاروق الفيشاوي في الفترة الأخيرة كانت صعبة جدًا، عشان كان حاسس بالهزيمة من مرض السرطان.
-بنتي ياسمين كانت هتعمل فيلم صعيدي في الجامعة الأمريكية، بـ دور غادة عادل، وبعد ما اتفقت جات قبل التصوير وقالت مش همثل.
-أنا زوج رومانسي وعاطفي جدًا وبجهز العشا لمراتي على ضوء الشموع.
-مراتي سابت التمثيل بعد سنتين من الجواز، وكان قرار خاطئ وكنت أتمنى إنها ترجع تشتغل وكانت مركزة معايا أنا بس.
-عندي لدغة حركية في الكلام، وهي مش عيب خلقي، وبتطلع لما أنفعل لأني كنت في مدارس فرنسية، وأثرت على نطقي.
-أنا عمري ما روحت عزا لوحدي أبدًا، كان دايما معايا فاروق الفيشاوي، والعزا الوحيد الذي روحته من غيره كان عزاه هو.
-أول ما شُفت الفيشاوي في معهد الفنون المسرحية قولت وقتها الواد ده جدع، وأنا عندي ملكة أعرف مين هيبقى صاحبي.
