الإعلامية ريهام سعيد
أثارت الإعلامية ريهام سعيد، الجدل، بعدما نشرت صور لوجهها بعد إجراء عملية لشد الوجه، وتتهم طبيب تجميل شهير بلبنان بتشويه وجهها.
ونشرت ريهام، صورتين قبل وبعد إجراء عملية شد الوجه، عبر حسابها على إنستجرام، معلقة: «يعني وصل بك إنك تشوهني وتموت ست قبلي وتحط صورة لواحدة مختلفة وتقول إنها أنا؟.. ده أنا كنت زي القمر قبل ما أجيلك.. مين الست اللي أنت حاططها دي؟.. عارف أنا هرفع عليك قضية وهبطلك الطب».
ليخرج من بعدها طبيب التجميل، ويرد على اتهام ريهام سعيد، بعد خضوعها لعملية جراحية مؤخرا في المستشفى الخاص به في العاصمة اللبنانية بيروت، حيث نشر مقطع فيديو يتضمن عدة صور لريهام سعيد، قبل وبعد إجراء العملية، مؤكدا نجاح إجراء شد الوجه لها، دون حدوث أي تشويه.
ولم يكتفي بذلك، فأصدر بيانا إعلاميا، قال فيه: «في أعقاب ما تم نشره مؤخرا على إحدى القنوات التلفزيونية، وتبعها صفحات مواقع التواصل الاجتماعي، وما تضمنته من أخبار كاذبة، ومضللة عن الدكتور نادر صعب حول إجراء تجميلي وأخطاء طبية.. لذلك اقتضى التنويه بأنه سيتم اتخاذ جميع الإجراءات القانونية والتدابير اللازمة ضد كل من الإعلامية والمحطة التلفزيونية التي ظهرت بها، وأن كل من يقوم بالنشر والترويج لمثل هذه الأخبار والتي لا أساس لها من الصحة ستتم ملاحقتهم قانونيا».
وتابع بيان الطبيب: «ونحن بصدد رفع دعوى على الإعلامية في لبنان ومصر، وكل من يظهره التحقيق محرضا كان أو شريكا بالجرم، وذلك بتهمتي المساس بالسمعة، والتشهير وإلحاق الضرر، والتي يجرمها القانون في الدولتين، كما سيتم تسليم جميع الأدلة والإثباتات التي تنفي ادعاءاتها الباطلة للجهات المختصة للنظر فيها.. نحن على ثقة تامة بصرامة وشفافية واستقلالية القضاء وأن لا شيء يعلوا فوق القانون».
ومن جهتها، ردت ريهام سعيد، على الطبيب في فيديو نشرته عبر حسابها على موقع «إنستجرام»: «أنا أول مرة أطلع بالشكل ده، وأنا بعمل كده علشان أنا مصممة إن أي حد يغلط يتحاسب.. أكيد الصور اللي نشرتها مش كويس لأي حد مشهور إنه ينشرها، وأكيد مش لطيف إني أطلع مشوهه، الدكتور طلع يقول إن أنا كويسة، أنا عايز أسال المتابعين بتوعي هل ده شكلي كده؟».
وتابعت ريهام: «أنا بقالي 3 أو 4 شهور بتعالج عند دكتور مشهور في لبنان، وفي سجلاته مثبت أنا شكلي كان إيه وعامله إزاي.. وروحت للدكتور نفسه من شهرين ملىء وجهي بالفيلر، ولو دوبته وشهي هيبقى في حفره، وكمان عيني بعالجها علشان كانت وارمه بسببه وعيني مرفوعة لفوق وأخدت حقن علشان يحصلها ارتخاء، واحتجت إني أعدل شكل حواجبي علشان كانت طلعه لفوق زي الشيطان، وكمان كل الأطباء أكدوا إنك حرقتني أثناء العملية.. أنا بقالي 11 شهرا من مارس اللي فات بتعالج وده شكلي بعد ما اتعالجت».
وأضافت: «أكيد عنده فيديو وأنا داخله يبين شكلي كان عامل إزاي، ياترى هتفبركوا إزاي، زي الصور المفبركة اللي نشرتها لواحده عندها 90 سنة.. بتقول عندك صور طيب طلعها، أنا عندي الصور بتاعتي وأنا دخلالك كان شكلي عامل إزاي، أنا ولا مرة طلعت قولت اسمه لحد ما نشر صور العملية قبل وبعد».
واختتمت: «هو بيقول إن أنا كنت عاملة عمليات كتير قبل كده وكانت بايظة وهو اللي بيضبط وشي، هو لما طلعنا من العمليات كان حاسس إنه عامل مصيبة، أنا معملتش غير عملية واحدة من 10 سنين عند دكتور ومات بسبب الكورونا، طيب أنا لو كنت عاملة عمليات كتير فاشلة قبل كده إزاي كان شكلي حلو، ودلوقتي باظ لما أنت جيت تعالجني!».
