أبرز تصريحات غادة عبد الرازق: كان نفسي في ولد.. وأنا كبرت في السن ونظرتي للحياة اتغيرت

الفنانة غادة عبد الرازق

حلت الفنانة غادة عبد الرازق، ضيفة على أحد البرامج الإذاعية، وتحدثت خلال اللقاء عن تفاصيل مسلسلها الجديد صيد العقارب، كما كشفت العديد من أسرار حياتها الشخصية.

ونرصد لكم أبرز تصريحات غادة عبد الرازق الإذاعية: 

 – مسلسل صيد العقارب عمل مختلف واكتشفت إن مؤلفه دكتور باهر دويدار كتبه من 10 سنين بالظبط.

 – أما بقعد أسرح في وشوش زملائي الفنانين اللى معايا في صيد العقارب بفرح جدًا، وأقول ايه الحلاوة دي كلهم ممثلين عظماء وكبار مركزين علشان نعمل حاجة كويسة فقط.

– أنا بحب بنتي روتانا جدًا وهي أهم نعمة في حياتي كلها، وبحمد ربنا عليها طول الوقت، لكن مش هكذب أنا كان نفسي في ولد، وكانت أمنية كبيرة عندي.

 – عندي ابن اختى بمثابة ابني بالظبط، ولو جاله دور برد بتجنن عليه وبخاف جدًا.

– أغلب البرامج استغلت صراحتي وأنا للأسف مكنتش واخدة بالي، لأن هو في مصلحته ياخد يجيب غادة عبد الرازق ويطلع بيها تريند وأنا متسرعة في الرد وصريحة جدًا واتأذيت من ده.

 – دلوقتي بقيت باخد بالي جدًا لو روحت برنامج أي سؤال ميعجبنيش على الهواء بوقفه عند حده وبقول ده عدم احترافيه.

 – الفانز بتوعي دمهم شربات ومعايا بقالهم سنين، أنا عندي ناس من 22 سنة وحافظين غادة عبد الرازق، وأنا اللي في قلبي على لساني، بس الحمد لله بقيت ماسكة لساني دلوقتي.

 – طلعوا عليا سمعة علشان يخوفوا مني المنتجين والمخرجين، زي أي حد ناجح أوي ومش عايزين نجاحه يكمل في شغلانتنا، والأعمال اللي اشتغلتها أثبتت إن اللي بيقولوه مش حقيقة، لغاية ما مصر كلها عرفت أن ده مش حقيقة، لكنه خد وقت وتعبني نفسيًا.

– سنة 2023 كانت حلوة أخدت فيها خطوات كويسة على الصعيد المهني والشخصي، وكنت سعيدة بـ تلت التلاتة وحدث بالفعل، وإني عملت فيلم هو لسة منزلش ولكن رجعت من خلاله للكوميدي.

 – بدأت أهدى وكمان كبرت في السن، والواحد لما بيكبر في السن نظرته بتتغير في الحياة فبقيت موزونة أكثر وبقول الحمد لله.

 – سلمى أبو ضيف مكنتش راضية تتف عليا في مسلسل حدث بالفعل، قولتلها أنتي بتفي على الشخصية مش غادة عبد الرازق، وإوعي تفتكري إني من النجوم اللي بيقولوا أنا متضربش.

 – قولت لـ سلمى أبو ضيف خليني أعلى معاكي علشان يبقى ليا رد فعل، وشديت شعرها وده مكنش مكتوب، وده التمثيل الحقيقي.

– متسألوش تاني على خلافي مع محمد سامي، هتفضلوا طول عمركم عايشين على القديم؟ إحنا في 2024 يا جماعة حرام عليكم، الناس هتعيش على الفضاء السنة اللي جاية وأنتم لسة بتتكلموا في غادة عبد الرازق ومحمد سامي؟.

 – طبيعي مي عمر تدافع عنه وأنا لو مكانها هعمل كده.

 – أنا عاطفية جدًا ودمعتي قريبة، وقوتي إني لما اتهزم أقف تاني، ولكن قوتي مش في إني مؤذية أو شريرة، أنا مش عارفة أبقى لئيمة.

 – أنا عندي 53 سنة ومعنديش أصحاب كان عندي صاحبتي خسرتها من 25 سنة وقاطعتها 6 سنين علشان اتكلمت عليا ومن سنة عملت نفس العملة تاني وسمعتها ومتسجل ليها، ليه أنا عملت فيها إيه؟ ولا خربت بيتها ولا خدت جوزها دي لو كانت طلبت عنيا كنت اديتهالها.

– بقول استغفر الله العظيم ربنا مبيديش كل حاجة، خلاص أنتي مالكيش رزق ولا في أصدقاء ولا في حياة عاطفية، أنا خلاص أٌنهكت.

 – أنا عكس ما الجمهور فاكر، وعمري في حياتي ما هكون مرتبطة بشخص وصوتي يعلى عليه، الراجل راجل والست ست، والاحترام أهم حاجة وعمري ما أتعدى عليه.