غادة عبد الرازق: مرفضتش وجود ليلى زاهر في تلت التلاتة عشان أنا ست ذكية وخبرتي كبيرة

الفنانة غادة عبد الرازق

علقت الفنانة غادة عبد الرازق، على مشاركة الفنانة ليلى أحمد زاهر معها في مسلسل تلت التلاتة الذي يعرض حاليا، بالرغم من تصريحات الفنان أحمد زاهر بشان وجود خلافات بينه وبين غادة.

وقالت غادة عبد الرازق في تصريحات تليفزيونية: أنا مختارة ليلى من قبل ما أحمد يطلع في برنامج ويقول إن فيه مشاكل بينا، أنا نفسي استغربت أوي كلامه، إحنا عمرنا ما اتخانقنا، هو أكيد حد وصله كلام غلط فهو اتضايق مني من غير ما يرجعلي.

وتابعت قائلة: لما ده حصل قالولي طيب ليلى هتكمل ولا إيه قولتلهم ليلى هتكمل طبعا؛ لأن مهنة التمثيل بروفيشنال، ومش هصفي مشاكلي الشخصية في أكل عيشي، مهنة التمثيل دي هي اللي عملتني. 

ووجهت نصيحة لـ أحمد زاهر، وقالت: بنصح أحمد إنه يتأكد من الحاجة قبل ما يقولها لأن الموضوع عدى معايا عشان أنا ست ذكية وخبرتي كبيرة، بس لو حصل مع حد تاني معندوش خبرتي مش هيتقبل ده وهتحصل مشكلة.

غادة عبد الرازق تكشف سبب تسارع أحداث مسلسل تلت التلاتة

واختتمت حديثها، كاشفة سبب تسارع الأحداث بشكل كبير في مسلسل تلت التلاتة، قائلةً: اللي خدم مسلسل تلت التلاتة إن أحداثه تكون متسارعة ورتمها سريع إنه هو كان معمول 30 حلقة وقصرناه لـ 15 عشان ضيق وقت التصوير، وجت من عند ربنا إن لما ده حصل خلى رتم الأحداث أسرع ومشوق أكتر.

تحدثت الفنانة غادة عبد الرازق عن الأسباب التي دفعتها لتقديم مسلسل تلت التلاتة، كما كشفت كواليس تصوير المشاهد التي تجمع الثلاث شخصيات التوأم بالعمل، ووجهت نصيحة للسيدات اللاتي تتعرضن للخيانة من زوجها.

وكشفت غادة عبد الرازق خلال تصريحات تليفزيونية، الأسباب التي دفعتها لتقديم تلت التلاتة، وقالت: اللي شدني فيه إنه مكتوب حلو أوي وفكرة الثلاث شخصيات التوأم حمستني، لأن كان اتعرض عليا كتير زمان إني أجسد فكرة التوأم بس كانوا بيبقوا اتنين بس، فكنت بشوفها مستهلكة أوي ومفيهاش جديد أقدمه للناس.

وتابعت: وتمسكت جدا إن الـ3 التوأم يبقوا شبه بعض شكلا في كل حاجة، وأنا شوفت ده في الحقيقة إن يكون توأم نسخة من بعض في الشكل والتعامل، وحسيت إن منطقة التشويق دي شبهي لأني نجحت فيها زمان الحمد لله.

وأضافت غادة عبد الرازق: وشدني إن الدور فيه تحدي إني أعمل 3 شخصيات توأم نسخة من بعض خارجيا، لكن مختلفين تماما داخليا، فـ ده كان تحدي لـ غادة عبد الرازق إني ألعب 3 شخصيات، ومن ضمن صعوباته إن في المشاهد اللي بتجمع الشخصيات دي مع بعض ببقى واقفة بمثل ومفيش حد قدامي.

وتطرقت غادة عبد الرازق للحديث عن كيفية تصوير مشاهد التوأم، وقالت: اللي بيحصل إن مثلا يبقى مشهد فيه الـ 3 شخصيات مع بعض، بلبس الأول لبس فريدة وأدخل أقعد على الكرسي مكانها، وأبص في اتجاه فرح وفريال وأكلمهم، وبعدين ألبس فرح وفريال وأتكلم في اتجاه الاتنين التانيين، وببقى شبه المجانين قدام فريق العمل.

مسلسل تلت التلاتة

على جانب آخر، يشارك في بطولة مسلسل تلت التلاتة إلى جانب الفنانة غادة عبد الرازق، كل من: محمد القس، أحمد مجدي، ليلى أحمد زاهر، وآخرون.