بعد أزمتها مع لوسي.. ندى عفيفي عن مشاركتها في العرض الجديد لمسرحية الحفيد: عودتنا رد اعتبار

الفنانة ندى عفيفي

علقت الفنانة ندى عفيفي على مشاركتها في العرض الجديد لمسرحية الحفيد، ذلك بعد استبعاد الفنانة لوسي، التي وقعت بينهما واقعة ضرب وقتٍ سابق خلال العرض على المسرح القومي.   

وقالت ندي عفيفي في تصريح خاص، إن عودة مسرحية الحفيد من جديد يعد رد اعتبار لكل فريق العمل من الجانبين الأدبي والفني بعد الأزمة الأخيرة.

وحول تطورات التحقيق في أزمة تعدي الفنانة لوسي عليها، أكدت ندي عفيفي: الحمدلله كل التحقيقات اتقفلت وإحنا كفريق عمل مغلطناش والأزمة حصلت من الطرف التاني، وأكبر دليل على كده إن العرض رجع تاني من غيرها.

أزمة ندي عفيفي ولوسي على خشبة المسرح القومي

 وبدأت الأزمة في عرض مسرحية الحفيد الأولى، عندما كشفت ندى عفيفي، تفاصيل تعرضها للضرب على يد الفنانة لوسي، خلال عرض مسرحية الحفيد، على المسرح القومي.

وقالت ندى عفيفي في تصريح خاص: لوسي نسيت الجمل لأنها مكنتش بتحفظ الجمل بالظبط، واحنا على المسرح حاولت أنقذ الموقف وكملت الدور، خبطتني بعصاية التنضيف قدام الجمهور وقالت لي جاتك القرف متجيش على جملي تاني، وسابت العرض شغال وخرجت، وضربت واحد تاني من زمايلنا كان مكتوب يتضرب قلم واحد ضربته 5 أقلام، وقالت له دا اللي مكتوب في المشهد يا حقير.. كانت مدعكة الحقيقة.

وسبق، وكتبت ندى عفيفي على حسابها الشخصي بموقع التواصل الاجتماعي فيس بوك: هخرج عن صمتي وأتكلم وأنا مرفوعة الراس ومش هتكسف أقول اللي حصل معايا في عرض الحفيد، أولا بأكد كل معلومة اتكلموا فيها زمايلي من انتهاكات حصلت في حقنا وكان سببها الفنانة لوسي بل بالعكس في حاجات كتير وتفاصيل كتير متقالتش.

لوسي بعد إعلان عرض مسرحية الحفيد ببطلة جديدة

وأشارت لوسي إلى أنه إذ تم عرض العمل بنفس الممثلين والمخرج، ستعود المشاكل مرة أخرى، متابعة: مفتكرش أن وزيرة الثقافة هتوافق بالإساءة للخشبة المسرح القومي، ولمصر وللأديان وللألفاظ الخارجة اللي اتقالت على المسرح، ومعتقدش إن حد يوافق على الكلام ده، وبالنسبة لي أنا بتمنى النجاح لكل الناس ويارب تنول النجاح اللي أنا عملته على خشبة المسرح القومي، أنما هما هما نفس الأشخاص ونفس المخرج هتبقى هلومه وبيعيدوا نفس المشاكل تاني وأنا بره المشاكل دي.

لوسي تتعرض لـ إساءة دينية وشخصية في المسرح القومي

وعن إعادة تقديم دور البطولة ببطلة جديدة في مسرحية الحفيد والتي يتم عرضها على خشبة المسرح القومي، أكدت لوسي أنها أخذت القرار من نفسها ولم يتم استبعادها من أحد، موضحة: أنا واللي وقفت من المسرحية ومحدش قالي أقف خالص، وأنا مش ندمانة لأني مش موافقة أقف على خشبة المسرح القومي أسمع إهانتي وأسمع إهانة الأديان وأسمع ألفاظ خارجة، أنا مسمحش بكدا ومعالي الوزيرة مش هتسمح بالكلام ده، وفيه مدير للمسرح وهو في السعودية وأكيد فيه قرار منه أنهم يعيدوا المسرحية تاني.

وتابعت لوسي: بس النيابة الإدراية لما حققت حققت مع الموظفين، هما موظفين أنا مش موظفة، واتحقق برضو معايا وقولتهم في دليل الكاميرات بس للأسف كل حاجة اتمسحت ودا كان ضدهم مش معاهم، بس برضو أنا معرفش لسه أيه هي حيثيات الحكم.

وأكدت لوسي أنها ستوافق على تقديم أعمال أخرى على خشبة المسرح القومي، ولفتت إلى أن وقوفها على هذا المسرح يزيدها شرفًا، معلقة: أنا غيرتي على المسرح القومي هي اللي وقفتني عن مسرحية الحفيد، غيرتي على قاعة سميحة أيوب، وعلى أم المسارح المسرح القومي، هي اللي خلتني أقف وأكلم معالي الوزيرة وأقولها في أخطاء جسيمة بتحصل جوه المبنى، جسيمة بمعنى الكلمة.

وختمت حديثها قائلة: بس أنا بتمنى للناس كلها النجاح والتوفيق ومش مضايقة من حد ولا متغاظة من حد، حفاظا على اسمي واسم المسرح القومي وقدسيته وخشبته العريقة اللي حملت أساتذتنا.