نجل محمد ثروت يروي تفاصيل علاجه من متلازمة ميلر فيشر: جالي 5 إعاقات وكنت بزحف للحمام

المخرج أحمد ثروت

كشف المخرج أحمد ثروت، نجل الفنان محمد ثروت، تفاصيل رحلة علاجه من متلازمة ميلرفيشر، مؤكدًا أنه أصيب بـ 5 إعاقات جراء هذا المرض.

وقال أحمد ثروت في لقائه مع الإعلامية منى الشاذلي، في برنامج معكم منى الشاذلي، المذاع عبر شاشة قناة ON: الحالة قبل ما أخد الحقن كان إحساسي بالرجل الشمال كان من منعدم، ومريض المناعة ملوش سيناريو ولا ليه علاقة بحاجة ولا بالجينات، وأنا بتنفس شغل ومكنتش فاهم إيه اللي حصل، وعمري ما تعبت قبل كده ولا خدت دواء ولا اتصابت بشيء وربنا حب ينبهني شوية، وكنت بسألهم بتدوني أدوية إيه وبتعملوا إيه؟.

وأضاف: أنا داخل المستشفى دي على رجلي، والدكتور قالهم إن عندي متلازمة ميلر فيشر والمرض ده سريع وبيأثر على العين والبلع وبيوصل للسكتة الدماغية، وأنا قعدت فترة مش عارف بتعالج من إيه، وفترة تانية مكنتش مصدق إن عندي ده.

وأضاف: ادوني 60 حقنة 30 سم فيها سائل مرعب سخن جدًا وأجسام مضادة، أخدتهم في 5 أيام، كنت باخد مسكنات كتير جدًا علشان أقدر آخد الحقن، كانت حرب أجسام غريبة داخل الجسم علشان تظبط المناعة، ووقتها اتصبت بفقدان حركة واتزان والرؤية كانت سودا.

واستكمل: مرة واحدة جالي 5 إعاقات بصر وحركة وفقدان القدرة على الكلام، وأول ما فقدت الحركة كلمت أصدقاء ليا من ذوي الهمم هما السبب إني كنت قوي، وسألتهم بنروح الحمام إزاي وبنلبس هدومنا إزاي؟ المفروض لما نشوف حد من ذوي الهمم نوطي ليهم ونقولهم أنتم أبطال، ولو حد كان دخلني الحمام مكنتش هقوم تاني من على الكرسي، زحفت كل يوم للحمام، الإنسان فعلًا ضعيف.

نجل محمد ثروت يروي تفاصيل أخذ عينة من سائل المخ

كما كشف نجل محمد ثروت، تفاصيل أخذ عينة من سائل المخ، قائلًا: كان لازم أول ما أروح ألمانيا ياخدوا عينة من سائل المخ علشان نشوف مدى انتشار المرض في جسمي وهل توقف انتشاره ولا لأ، ومكانش ينفع آخد أي بينج علشان كيمياء المخ متتغيرش، وكانت رحلة 15 دقيقة صعبة، أنا كنت بسمع نفسي متأخر، أنا قعدت أول شهرين مش موجود وكل اللي أنا فاكرة إني مكنتش بحب حد يساعدني خالص، وكنت ببعد عن نظرة الشفقة اللي فيها عاطفة مع إنها مريحة.

وقال أحمد ثروت في لقائه مع الإعلامية منى الشاذلي، في برنامج معكم منى الشاذلي، المذاع عبر شاشة قناة ON: ربنا اختصي وحب يقولي كلمتين على جمب، وحب يعرفني كلمة الله أكبر حرفيًا لما تحس أنك وصلت لمستوى من النجاح وإني تحولت لروبوت جوا الشغل، وربنا خلاني أعرف أقيم كل حاجة وتقصيري مع أهلي ونفسي.

وأضاف نجل محمد ثروت: كنت في شغل وخلصت ووقت حملة قادرون باختلاف، وأنا واقف لاقيت بكح نقطة دم ومكنش فيه اتزان خالص والأبعاد متغيرة والقوة منعدمة ومش حاسس إني ماشي على أرض صلبة، المرض ده سريع بطريقة غير عادلة وفي ظرف 30 دقيقة فقدت الحركة، وأنا سايق العربية لقيت عيني الشمال قفلت، وروحت المستشفى وقالوا جلطة لأن مفيش حد هيتوقع أن هييجي مرض لبني آدم واحد من كل 100 مليون.

نجل محمد ثروت

وفي سياق آخر، سبق وفاجأ أحمد ثروت والده، في أثناء إحيائه حفل ليلة من الزمن الجميل، التي أقيمت في الأيام الماضية في السعودية، تحت رعاية هيئة الترفيه بالسعودية، ضمن حفلات جدة، والذي كان أحد مطربيها الفنان الكبير محمد ثروت.

كما شاركه نجله أحمد خلال الحفل، وذلك بعد تماثله للشفاء من متلازمة ميلر فيشر، وقدم له أغنية ابن أبويا، كما قدما دويتو أغنية كده يا قلبي، للفنانة شيرين عبد الوهاب.