المخرج خالد يوسف
أعرب المخرج خالد يوسف عن سعادته بعودة تعاونه مع الفنانة زينة خلال فيلمه الجديد الإسكندراني، المأخوذ عن وراية الكاتب الراحل أسامة أنور عكاشة، مؤكدًا أنها تصب كامل تركيزها على العمل، ولم تختلق المشكلات كما أشيع عنها خلال الفترة الماضية.
وقال خالد يوسف، في لقائه بـ برنامج عرب وود: زينة أنا بشوفها ممثلة مهمة جدًا، وما يُقال عن إن في مشاكل بتحصل انا مبشوفهاش كده خالص، وبصراحة شديدة لما اشتغلت معاها في كارما مفيش ربع مشكلة عملتها، ولا مع فريق العمل ولا في المناخ ولا شخصيتها، وهي مجتهدة جدًا ومكرسة وقتها للعمل ومركزة جدًا.
وأضاف خالد يوسف: مفيش أي حاجة من اللي بيقولوها دي شوفتها على زينة، علشان كده أنا متحمس أشتغل معاها تاني.
تفاصيل شخصية زينة في فيلم الإسكندراني
وكشفت الفنانة زينة تفاصيل شخصيتها في فيلم الإسكندراني، حيث قالت في لقائها: اسم الشخصية قمر، وقمر هي بنت إسكندرانية جدعة وحياتها ظالمة، يعني فيه ظلم هنا في الشخصية.. وظلم مشاعر وخداع وكدب وخلينا نشوف الفيلم، وأي عمل بيبقى مسئولية وباخد كل عمل بمسئولية، وهقدم شخصية كلها على بعضها مختلفة.
زينة: الست المصرية مكافحة.. ومعظم أفلامي تجارية
وعن تفاصيل شخصيتها في فيلم الإسكندراني، فقالت زينة: هقدم شخصية مختلفة، وأنا بعمل شخصية قمر هي بنت إسكندرانية جدعة وبتعيش حياة ظالمة بس بتكافح وبتعيش زي أي ست مصرية، وأنا بحس أن الستات دايمًا مكافحين في الحياة والست الكويسة تعيش على قد اللي معاها.
وأضافت: الشخصية هيكون فيها ظلم مشاعر وكذب، وأي عمل بيبقى مسؤولية حتى لو حاجات أنا ساعات ببقى مترددة جدًا إني أعملها، والله ببقى متقنة فيها أكتر من حاجات تانية.
وتابعت: الوجع الرومانسي للشخصيات الدرامية تمثيله أحلى، وأهم حاجة أن بطلة الفيلم متستهونش بأي مشهد، لما أعمل فيلم كبير لازم أبقى حقيقية وأقدم رسالة.
وأكدت الفنانة زينة أن معظم الأفلام التي قدمتها خلال مشوارها الفني، كانت تجارية.
أبطال فيلم الإسكندراني
ويشارك في فيلم الإسكندراني بجانب الفنان أحمد العوضي مجموعة من النجوم أبرزهم زينة، محمد رضوان، انتصار، حسين فهمي، صلاح عبد الله، محمود الليثي، محمود حافظ، وغيرهم من الفنانين، والفيلم من إخراج خالد يوسف.
