محمد علي رزق لـ منتقدي الفنانين: وأنتم بتسنوا السكاكين وبدمروا أي حد ما تنسوش المخرج

الفنان محمد علي رزق

وجه الفنان محمد علي رزق رسالة شديدة اللهجة، لمستخدمي مواقع التواصل الاجتماعي، الذين ينتقدون الفنانين والأعمال الفنية بشكل مستمر.

وكتب محمد علي رزق، منشورًا عبر حسابه الرسمي بموقع فيسبوك، وقال: الأفاضل نقاد السوشيال ميديا الكرام تحية طيبة وبعد، ممكن وحضراتكم بتسنوا السكاكين وبتقرروا تدمروا أي حد بيبدأ وبتهينوه وتتمسخروا على تمثيله، تجيبوا سيرة المخرج، علشان المخرج هو المسئول الأول عن النتيجة اللي بنشوفها.

وتابع محمد علي رزق: وياريت برضه وأنتوا بتمجدوا في الممثل وبترفعوه لسابع سما ياريت برضه تجيبوا سيرة المخرج علشان المخرج هو المسئول الأول عن النتيجة اللي بنشوفها.. كل الشكر لـ 100 مليون ناقد.

محمد علي رزق ينتقد مشهدًا من مسلسل ليه لأ 3

واعتاد محمد علي رزق على التعبير عن آرائه من خلال حسابه على فيسبوك، حيث هاجم أحد مشاهد مسلسل ليه لأ 3، الذي عرض على منصة شاهد مؤخرًا، وجاء ضمن المشهد جملة على لسان أحد أبطال العمل، وهي: إحنا مش بنعلم تمثيل أوي في كلية الآداب قسم مسرح.. أكاديمية الفنون هي بتاعت التمثيل اللي بجد.

وكتب محمد علي رزق منشورا في هذا الصدد، عبر حسابه معلقًا: بتفرج على مسلسل ليه لأ الجزء الثالث، ومنكرش حبي الشديد لمسلسل ليه لأ من الجزء الأول علشان بيناقشوا قضايا مهمة وبشكل مختلف، بس شوفت مشهد عزومة في حلقة 8 وفجأة في آخر المشهد إتنين ممثلات لطاف جدًا، بيقولوا الجملة دي، طبعًا أكاديمية الفنون الصرح اللي طول عمره مليان أساتذة كبار وطلع أجيال كتير مهمة، لكن تصحيح للأساتذة اللي كتبوا المسلسل، لأ يا فندم قسم آداب مسرح بيعلم تمثيل بجد، وفيه نجوم خريجين قسم آداب مسرح.

وأضاف محمد: وناس كتير قالتلي إن زي ما كان عندك الشجاعة وطلعت وطلبت من الناس تعتذر وصححت المعلومة الغلط اللي في المشهد لازم يكون عندك الشجاعة عشان خاطر تمنع تأييد الحريات، تمام يا جماعة مش هكابر أنا ضد تقييد الحريات وعايز أعيد وأكرر معلومة إني من جمهور مسلسل ليه لأ وقولتها في البوست والفيديو الأولاني ومعنديش مشكلة مع العمل نهائيًا أنا عندي مشكلة مع معلومة غلط.

وأردف محمد علي رزق: إحنا مش كلية نظرية يا أساتذة، إحنا كلية عملية، الشركة مشكورة وناس محترمين وورشة سرد وطلعوا بيان بيعتذروا فيه وبيقولوا إنهم بيفرقوا بين التجربة النظرية والتجربة العملية، آداب مسرح نظرية والأكاديمية تجربة عملية، أنا بردو بصحح المعلومة اللي في البيان يا فندم إحنا كلية عملية بندرس نفس مواد أكاديمية فنون وبندرس تعبير حركي ومناهج إخراج وفوكاليز ونوتة وكل المواد اللي بيتم تدريسها في أكاديمية الفنون بيتم تدريسها في آداب مسرح في جميع أنحاء مصر.

وتابع محمد علي: النقطة التانية إني أقول من الفيديو ده والفيديو اللي فات مش إثبات إني ممثل شاطر أو إني معايا شهادة عظيمة، خالص، الحمد لله الواحد في المهنة من زمان ودلوقتي عندي 37 سنة وبشتغلها من وانا عندي 15 سنة، فمش هاجي النهاردة أقول أنا ممثل، وراضي بحكم الجمهور وإن شاء الله أكبر عشان كده، أنا بتكلم عشان الطلاب الصغيرين اللي لسه بيشقوا طريقهم وبصححلهم المعلومة المغلوطة.

واختتم محمد علي رزق قائلًا: وأقسم بالله العظيم لا آداب مسرح ولا أكاديمية ولا الجن الأزرق بتعلم تمثيل الموهبة ثم الموهبة ثم الموهبة، فيه نجوم كتير على الساحة مدخلوش لا المعهد ولا آداب مسرح، أنا ضد تقييد الحريات ونقول أي حاجة وقد تكون غيرتنا الفنية على القسم بتاعنا حركتنا.. فأنا بقول إن المعلومة اللي في المسلسل غلط مش أكتر ولا أقل، حابين تقولوا حاجة براحتكم وأنتوا حرار وشكرًا على البيان بتاع الشركة اللي كان غلط بردو إحنا مش دراسة نظرية وإحنا دراسة عملية.