بعد عودته للغناء.. خالد الفايد: طردت الأفكار الهدامة من دماغي وأول يوم أنام مرتاح نفسيًا
كتبت: ياسمين ياسر
الشاب خالد الفايد
أعلن الفنان الشاب خالد الفايد عودته للغناء من جديد، بعد أن كان اعتزل الغناء وحرم الفن في الفترة الأخيرة، حيث عاد من جديد للغناء وأكد أن هناك جماعات إسلامية كانت تسيطر على أفكاره.
وكتب خالد الفايد منشورًا عبر حسابه الشخصي بموقع التواصل الاجتماعي قال فيه: حلو أوي إنك تعمل الحاجة اللي بتحبها، وتسيبك من كل القيود والأفكار الرجعية، أول يوم أنام مرتاح نفسيًا وحاسس أني بعمل حاجة صح، ولقيت نفسي وطردت الأفكار الهدامة من دماغي، انتصرت على نفسي الحمد لله.
وكان خالد الفايد فاجأ متابعيه بقرار عودته للغناء من جديد بعد تحريمه للفن، وحديثه عن اعتزال الغناء مدى الحياة لكن بعد ذلك تراجع عن قراره، وقال الفايد في تصريحاته : مركز دلوقتي لو اتصالحت مع أستاذ هاني محروس أركز في شغلي وحياتي والتزم وأصلي، ولو مقبلش بالصلح واعتذاري من حقه، كفاية إني خرجت من الفكر اللي كنت فيه.
وأضاف الفايد: مش أي حد يربي دقنه أو بيحفظ أو يدي درس في الدين يبقى شيخ، فيه مرجع إسلامي لينا وهو الأزهر ده اللي نرجعله ديمًا ونروحله على طول، الباقي مُدعين، ومعظمهم باحثين وقارئين مش أكتر، واتعلمت إني أعمل اللي بحبه وأسيبني من الناس، عايز أقول إني لما بطلت كنت مخلص جدًا ولا كان في نيتي أي تريند والموضوع طلع لوحده تريند أول مرة ومش بسعى له ودي حاجة بتاعت ربنا ودلوقتي لما سألت وعرفت والناس كويسة دلتني على الصح، تفكيري بيتغير، الواحد كل فترة تفكيره بيتغير
وتابع خالد الفايد: الناس اللي قالولي بطل وبطلت معاهم، حسيت إن فيه حاجة غريبة وإن مش دي حياة ملتزم صحيحة، كان فيه منهم بيجاهد وآه من جماعة إسلامية، قربوا مني وقعدوا يلعبوا في دماغي ولكن مكلمونيش في الجهاد، لاحظت إن عندهم خَلل، تفكيرهم كان يودي في داهية، فيه منهم واحد متجوز 22 مرة، النبي مكنش كده يعني.
وأضاف خالد الفايد: كنا بناخد دروس دين مع بعض وفيه واحد جيه حذرني منهم واحد بثق فيه وقالي خلي بالك عندهم خَلل، ومع الملاحظة اكتشفت ده فعلًا، يعني أصغر واحد فيهم عنده 23 سنة، ومتجوز 3، يعني سايب الدين كله ومركز في نقطة تعدد الزوجات، وروحت وسألت في الأزهر عن موضوع الغناء وقالولي طلاما الفن حاجة كويسة بتقدمها مش بتتعارض مع الأخلاق والأدب والذوق العام مفيهاش اي حاجة خالص، وأنا بصراحة ارتاحت جدًا والكلام مؤيد للمنطق والعقل والدين.
واستكمل خالد الفايد حديثه، قائلًا: أنا غلط في حق هاني محروس كتير، هما بردو قعدوا يزنوا ويضغط عليّا إني أنزل وأعمل كل ده، أنا عيشت أيام سوداء؛ بسبب كلامهم وغبائي، مش بقول إني مغلطش ولكن أنا غبي إني مشيت وراهم.
