ميمي جمال: أول أجر لي كان 10 جنيهات.. ومسلسل «أهلًا أهلًا بالسكان» بداية نجوميتي

الفنانة ميمي جمال

قالت الفنانة ميمي جمال إن مشكلة أجور الفنانين المرتفعة ليس لها حل، مشيرة إلى أن الزيادة ترجع إلى عدة أسباب، وهى زيادة وسائل العرض، مثل موقع يوتيوب والمنصات الرقمية والقنوات.

وأضافت ميمي جمال، خلال لقائها ببرنامج «واحد من الناس»، الذي يذاع على شاشة «الحياة» ويقدمه الإعلامي عمرو الليثي: «في فيلم (الخطايا) المخرج حسن الإمام كنت بخاف منه أوى، طلب مني أعمل دور البنت اللى بترد على عماد حمدى بدلع أوى وده كان أول دور أخدت فيه 10 جنيه أجر».

وتابعت: «بعدها عملت فيلم (نهر الحب) للفنانة فاتن حمامة وعمر الشريف، ثم فيلم (عدو المرأة)، ومسلسل (أهلا أهلا بالسكان) ده كان أول ظهور حقيقى لموهبتى، في دور سوسو طرب مع الراحل الكبير حسن عابدين».

وقالت ميمي جمال، خلال لقائها مع الإعلامي عمرو الليثي ببرنامج “واحد من الناس” الذي يذاع على قناة الحياة: “كنت زميلة حسن مصطفى في فرقة سيد بدير لمسرح التليفزيون، وكنت مخطوبة لظابط لمدة سنة و نصف وقال لي أنا مستنيكي تخلصي تمثيل وبعدين نتزوج، لأن أنا ماينفعش تبقى مراتي ممثلة، وحصلت لى كسرة وقتها”.

وأضافت: “كنت بعمل مسرحية مطرب العواطف، وكنت بحكي لحسن على اللي حصل معايا، و كان والدى متوفى من وأنا صغيرة، وكان بيحكي لي على كل حاجة وهو كان متزوج وعنده بنت” .

وتابعت ميمي جمال: “الأستاذ سيد بدير قال لي طالما بتحبوا بعض طيب ما تتزوجوا، أنا قلت ليه لا؟ لكن ازاي هو متزوج و عنده بنت”.

وقالت: “سيد بدير قال له شوف مراتك وبنتك هتعمل معاها ايه وبعد كده نشوف، بعدها حسن طلق زوجته لأن في مشاكل بينهم كتير، وماما كانت رافضة الزواج لأنه أكبر منى، و كان وكيل وزارة في التربية و التعليم و كان ماسك المسرح المدرسي”.

وأضافت: “ضغطت على ماما وتزوجنا، وقلت لها احنا هنشتغل احنا الاثنين ونكبر مع بعض، وحسن كان بيغير عليا بدون ما يحسسنى، ومرة فى المسرح، وتحديدا مسرحية (دو رى مى فاصوليا)، كنت لابسه سواريه، وواحدة زميلة ربنا يسامحها، قالت لحسن أنت مش شايف ميمي بتلبس ايه على المسرح، بعدها لاقيته داخل عليا المسرح وبعد العرض قال لي انتي على طول بتلبسي كدة ولازم الفستان يتغطى بشال، وكنت مزنوقة فى العرض وملحقتش أجيب الشال.

واستكملت قصة أزمتها خلال المسرحية مع زوجها، وقالت: “هو عرف اني مش لابسة الشال، وقال لي كدة مش هينفع نكمل مع بعض، لأني قلت حاجة وأنتي ما نفذتيهاش، بعد 30 سنة زواج، وفعلا ساب البيت وبقى يبات عند سمير خفاجة، وأنا عملت الشال للفساتين، وكلمت سمير يقوله ميمي عملت اللي أنت عاوزه و اتصالحنا”.