الفنان مصطفى كامل
قال الفنان مصطفى كامل، نقيب المهن الموسيقية، إنه لن يقبل بالتطاول على النقابة أو عليه، مؤكدًا أن كل شخص لديه حق الشكوى ولكن غير مسموح بالإساءة للنقابة.
وأوضح مصطفى كامل في لايف عبر حسابه بموقع فيس بوك، عقب تقدمه اليوم بأوراق ترشحه على مقعد نقيب المهن الموسيقية: مش هنجيب ناس يشتغلوا متعهدين ويرتشوا ويضيعوا مال النقابة، وأنا معايا بلاوي وشيلت اللي كانوا عاملين البلاوي وتحت إيدي المستندات والأدلة، وشرفي أهم من مهنتي وهتدور بمنتهى الشرف والأمانة والنزاهة والحب والاحترام.
وأضاف مصطفى كامل: مالكوش حق تسبوا في النقابة، ده عيب لأن دي أكبر مننا كلنا وده بيتنا سواء وافقنا أو رفضنا، ولو غلطت في الكارنية، يبقى ما تستحقش تشيله وأنا مش هدي الكارنية ده لأي حد دون المستوى سواء أخلاقي أو بيقل أدبه؛ لأن فيه شؤون قانونية ونقيب ولجنة تحقيقات ووقت ما يبخس حقك اعمل اللي أنت عاوزه، الكيان ده بيراعى آلاف الأسر، وقيمة المعاشات اللي زادت بتعدي مليون و800 ألف جنيه، وكل ما بتدار بشرف كل ما المعاشات هتزيد أكتر.
أنا راجل ليا دماغي وبشتغل بأولويات
وتابع مصطفى كامل: أنا راجل ليا دماغي، وبشتغل بأولويات ومحدش قدر يأثر عليا وليا دماغي واختارت أكون مع الله، وأي إخفاق أو تقصير أو محاباة مقصودة لأن كان عندي أولويات وما أقدرتش أهد كيان بيرعى أكتر من 2600 عضو بياخدوا معاش منه، وده مش مكان سهل، والفترة اللي فاتت كنت بهرب من المقابلات علشان النقابة لا يزج باسمها بأي حاجة ويا رب اللي عملته يقعد في صحة ولادي، لأننا أدرنا خلال 8 شهور بمنتهى الشرف.
واستكمل مصطفى كامل عارضًا لبعض المشكلات التي كانت تواجه النقابة وتضيع أموالها قائلًا: لقيت زميل بيكلمني وعامل أنه بيحتضر، وقال لي عاوز يقعد 3 أيام في العناية المركزة والمستشفى رافضة، لما كلمت الدكتور فهمت أنه بيدعي المرض.. وبعد كده مفيش حد هيتفسح تاني في المستشفيات.. ليه تتخانق في البيت مع مراتك وتقعد أربع أيام في العناية المركزة.
أحلامي الفترة الجاية هتكون أعلى
وأضاف مصطفى كامل: عاوزين ناس شرفاء وأمناء على حقوق الغلابة، ومش بحب الفساد ولا أنا راجل فاسد ولا هقبل بحد فاسد معايا، وأحلامي الفترة الجاية هتكون أعلى على المستوى الإداري والخدمات والموظفين والواجهات المرشحة، وبحق كتاب الله ما ليا قائمة، ومش هوصي حد على حد وكله بمجهوده وعلاقته، ومش هقدر أمسك غير كتاب ربنا وماليش قايمة وزملائكم مطروحين عليكم وتوكلوا على الله وأنا مع الله وهفضل مع الله.
وأردف مصطفى كامل: مش هقبل كلام وحش على النقابة، ومفيش نقابة محترمة تسمح إن حد فيها يكتب عنها نقابة الفساد والعار، إزاي تكتب على بيتك كده ولا نفسك، لو شفت عار تقدم لرئيس مجلس الإدارة ولما ما يجيش حقك اعمل اللي أنت عاوزه، لكن ليه تكون قاعد فاضي وتكتب نقابة العار، ولاحقا لو ربنا ولاني الأمر ده مش هيكون مقبول، وبقرارات مجلس الدولة هناخد قرارات وهنرفع قضايا في المحاكم لأنها جريمة والدولة تجرم السب والقذف إلكترونيا.
