ألبوم صيف 2023
كشف الفنان محمد حماقي، عن موعد طرح ألبوم صيف 2023، الذي يعكف على تحضيراته خلال الفترة الحالية ويتعاون به مع الشاعر أيمن بهجت قمر في أكثر من أغنية، بالإضافة إلى تحضيره ديو جديد.
موعد طرح ألبوم حماقي الجديد
وقال حماقي خلال مؤتمر صحفي أقيم على هامش إحيائه حفلًا في جدة منذ بضعة أيام: مفيش سينجل في صيف 2023، هيكون فيه ألبوم كامل، وهبتدي أنزل فيه بعد العيد.
وعن تعاونه مع الشاعر أيمن بهجت قمر، أردف: مشتغلناش الألبوم اللي فات بس السنة دي فيه مشاريع كتير في الألبوم إن شاء الله، مشيرًا إلى أن هناك مشروع ديو يتم التحضير له في الفترة الحالية، وسيتم الإفصاح عن تفاصيله بعد الاتفاق عليه.
وعن طقوسه قبل الصعود على المسرح، تابع حماقي: مفيش أكل كتير يوم الحفلة، أقصى حاجة بأكلها مكرونة مسلوقة مثلًا، ومرة محمد زكي أكلني خروف شاورما قبل الحفلة كنت هنام، بس في العادة مش باكل حاجة تقيلة، بالعكس عشان تديني طاقة أغني وأنا مرتاح، وديمًا قبل ما أطلع على المسرح بخمس دقائق بحب أكون لوحدي خالص ومش معايا حد عشان أجمع تركيزي وطاقتي.
وعن مشاركة الفنان شريف منير في الحفل معه، أضاف حماقي: طلب مني حضور الحفلة عندما التقينا في مسرحية ميمو للفنان أحمد حلمي، وقولتله يشرفني بس لو جيت هتلعب أغنية، وجيه ووفى بوعده، والجمهور اتبسط وهو كمان، وديمًا بقول احنا كسبناه في التمثيل وخسرناه في المزيكا.
حماقي: مدرستي في الغنا هي الإحساس
وأضاف: أنا يمكن مدرستي في الغناء هي مدرسة الإحساس، فلو فكرت في نطق الحرف كويس هتبتدي دماغي تشتغل وده هييجي على الإحساس وده اللي بيخوفني شوية.
وأردف حماقي: بس لو قعدت ذاكرت شوية لدرجة إني مفكرش إذا كانت الكلمة صح ولا غلط ممكن تتظبط، بس الحقيقة أنا أتمنى أغني بكل اللهجات العربية.
