الفنانة بشرى
تحدثت الفنانة بشرى، عن أجدد أعمالها السينمائية فيلم أولاد حريم كريم، مؤكدة أن العمل قدم للسينما وجوه جديدة، بجانب تحقيقه لنجاح كبير.
وقالت بشرى، في تصريحات إذاعية: إحنا كنا عايزين نعرض الفيلم يوم 23، ولكن الموزع هو اللي شاف أن ربما يكون أفضل وإلا كان هيتأجل الفيلم لموسم تاني خالص، ودورة الفيلم بقت سريعة ومينفعش الفيلم يتعمل ويستنى كتير.
وتابعت: الفيلم بالفعل محقق نجاح كبير ومحقق إيرادات كويسة أوي بالنسبة أن في أفلام تانية بتمر مرور الكرام، وللأسف دور العرض مبقتش تجيب إيرادات إلا إذا كان الأفلام لـ أسماء كبرى.
أما عن غياب الفنانة ياسمين عبد العزيز، والفنان طلعت زكريا عن فيلم أولاد حريم كريم، فعلقت بشرى قائلة: فيلم أولاد حريم كريم من غير طلعت زكريا وياسمين عبد العزيز مغامرة، والمغامرة موجودة في كل حاجة، الصناعة دلوقتي قائمة على المغامرة مش أي أُسس علمية، وأولاد حريم كريم هما الجيل الجديد وده المهم إننا بنقدم وجوه جديدة للسينما، والسينما عايزة أن الصناعة تستمر ونفرش للمستقبل.
وأضافت: إحنا عندنا محدودية في نوعية الموضوعات اللي ينفع نتكلم عنها فإنك ترجعي حالة حلوة كانت موجودة زمان وتبني عليها وتجيبي شباب جداد، لأن السينما عندنا محتاجة وجوه جديدة طول الوقت.
واستكملت: محتاجين شباب ينفع تكون نجوم سينما، لأن مع الاحترام للنجوم كلهم ولكن بيكبروا وفي أدوار في سن معين تتطلب شباب صغير، وده اللي حققه فيلم أولاد حريم كريم وأثنوا عليهم معظم النقاد والجمهور.
وطالبت بشرى وسائل الإعلام بعدم التركيز على الحفلات والفساتين والاهتمام بالندوات والأفلام قائلة: أهم حاجة جودة الأفلام لأني مش من هواة السجاجيد الحمراء والحفلات وننسى الفعاليات والندوات الصباحية اللي أنا بحرص على حضورها من الساعة 9، وده مهم التراكيز عليه وأتمنى من الإعلام عدم التركيز على حوار السجاجيد والحفلات والفساتين ونركز على المضمون الحقيقي لأن سبب نجاح المهرجان عالميا الندوات، وحلقات النقاش وورش العمل وكمان الأفلام.
بشرى تعلن استقالتها من الجونة
وأعلنت بشرى العام الماضي استقالتها رسميا من مهرجان الجونة السينمائي، بعد أن كانت واحدة من مؤسسيه، وذلك في منشور عبر حسابها بموقع فيس بوك، مشيرة إلى أنه في ضوء المتغيرات العالمية والكونية كان عليها أن تواكب هذا التغيير.
وعن سبب استقالتها، قالت بشرى في تصريحات تلفزيونية، إن وجوده في إدارة مهرجان الجونة لمدة 7 سنوات أثر على عملها كممثلة.
