إيمان العاصي: رامز جلال بيعمل مقالب في الحقيقة أكتر وفي التلفزيون بيرحمنا.. ولو أعرف مستحيل أروح

الفنانة إيمان العاصي

علقت الفنانة إيمان العاصي على استضافتها في برنامج رامز نيفر إند، الذي يقدمه الفنان رامز جلال.

وتقع إيمان العاصي ضحيته في إحدى حلقات موسم رمضان 2023، التي يتم تصويرها في المملكة العربية السعودية.

وقالت إيمان العاصي خلال استضافتها في برنامج تفاعلكم عبر قناة العربية: ضهري قعد أسبوع واجعني، ومحصليش حاجة كبيرة ولكن اتألمت وأنا بلف في الغسالة، مسامحة رامز لأني أعرفه من زمان جدا وإحنا أصحاب وبحبه جدًا جدًا، وإحنا خدناه كله على بعضه كده بجنانه وتفكيره اللي محدش يتخيله.

وأضافت: هو مخلانيش أمشي غير وهو مراضيني ومبعرفش أزعل منه، وهو في الحياة الشخصية بيعمل أكتر من كده، ده في التلفزيون بيرحمنا.

وأردفت إيمان العاصي: لو كنت أعرف بالمقلب مكنتش هروح طبعًا، أنا بخاف وجبانة جدًا، حتى لو أنا عايزة أروح وبلغوني بالموضوع مش هتخيل هيعمل فيّا وهفكر في إن ممكن يكون حظي وحش وأبقى الضحية الحقيقية بجد، ولو كنت أعرف مستحيل كنت أروح.

إيمان العاصي في رمضان 2023

وحققت الفنانة إيمان العاصي نجاحًا ملحوظًا بمشاركتها في موسم دراما رمضان 2023 بشخصية دلال في مسلسل جعفر العمدة مع الفنان محمد رمضان، وهي الزوجة الثاني للفنان محمد رمضان الذي يلعب دور جعفر العمدة، وفي الحلقة 22 من المسلسل تم تغيير مسار الخط الدرامي لشخصية دلال، حيث إن الجمهور اكتشف أنها مَن خططت لاختطاف نجله وهو الألم الذي يعيش به منذ 19 عاما.

وأضافت إيمان العاصي: كنت متوقعة النجاح من وإحنا بنقرأ المسلسل وبنعمل بروفات، وأستاذ محمد سامي كان عنده طاقه بيوزرعها على فريق المسلسل كله وإننا هننجح نجاح منجحناهوش قبل كده وهنفضل مبسوطين 10 سنين قدام بالنجاح ده، وكنت عارفه إن فيه نجاح قوي، بس مش متخيلة بالطريقة العظيمة دي كل يوم عندنا نجاح وحكاية والجمهور بيكتر ويكبر كل يوم.

إيمان العاصي: دور دلال كنت بدور عليه طول عمري 

وأردفت إيمان: دايمًا بتحط في دور البنت الحلوة والرومانسية والكيوت وأنا ده عملي أزمة وخلاني أقعد كتير أتعطل لأن مفيش حاجة تانية أضيفها لكاركتر الكيوت، وحسيت إن دور دلال حاجة بدور عليها طول عمري وبدور عليه من بداية مشواري الفني ولقيتها وبقيت ماسكة فيها بكل قوتي وإن دي فرصتي.