الفنان تامر حسني
رد الفنان تامر حسني على هجوم الفنان أحمد آدم خلال برنامجه بني آدم شو، مؤكدًا أن الأخير كان يقدم نموذجا للتريند بشكل عام، واصفا إياه بأنه جنن عقول بعض الناس في العصر الحالي.
وكتب تامر حسني منشورًا عبر حسابه الشخصي بموقع تبادل الصور والفيديوهات القصيرة انستجرام، حيث قال: أستاذ أحمد آدم فعلا بيدي درس حقيقي بيشرح فيه سمات العصر الحالي اللي كلمة تريند فيه جننت عقول بعض الناس وخليتهم يبيعوا مبادئهم وصداقتهم وأمانتهم، لمجرد إن الناس تعرفهم أو تتكلم عليهم.
وأضاف تامر حسني: ولو ليوم واحد ونسيوا أنه لا يصح إلا الصحيح عشان ده عدل ربنا، وأي أفاقين مع الوقت هتلاقيهم بيختفوا والمحترم الحقيقي هو اللي بيستمر أصل لما نهتم ونرد على كل كداب أمال اللي بيحبونا نعمل معاهم إيه !!!!؟.
وتابع تامر حسني: الحقيقة أن فعلا الكلام السلبي هو اللي انتشر شكرا أستاذ احمد آدم لكلامك وإشادتك الحقيقية في حقي هي شهادة عظيمة من فنان محترم وكبير بفنه وأخلاقه.
هجوم أحمد آدم على تامر حسني
وكان أحمد آدم قد هاجم تامر حسني مؤخرًا، حيث قال خلال برنامجه آدم شو: تامر حسني مين مش واخد بالي، مش كفاية عليك كده بقى واللا إيه، أول ما طلع طلعلنا شعر صدره وقعد يمصمص في شفايفه ويسبّل للبنات.
وأردف أحمد آدم: وبيقدم شوية أغاني تعبانة ويعني إيه أكتر حاجة بحبها فيكي.. طيبة قلبك.. إسفاف، وأفلامه وحشة جدا، وهو اللي بيألف وبيخرج وهو اللي بيعمل موسيقى تصويرية، وهو اللي بيقطع التذاكر بيعمل كل حاجة، أنت مغني ولا كوميديان ولا أنت إيه بالظبط؟.. كفاية عليك كده.
أحمد التهامي يعتذر لـ تامر حسني بعد اتهامه بالسرقة
وكان الفنان أحمد التهامي، قدم اعتذارًا للفنان تامر حسني بعدما اتهمه سابقًا بسرقة فيلم تاج، وذلك من خلال منشور عبر حسابه الشخصي على موقع فيس بوك، إذ علق: كلامي اتفهم غلط، أحب أوضح سوء التفاهم اللي حصل بخصوص البوست بتاعي اللي كتبته بخصوص فيلم تاج اللي اتفهم غلط لأن أي حاجة كتبتها على صفحتي لازم برضه أوضح وأرد على صفحتي.
وأضاف التهامي: أنا لم أقصد أن أوجه أي إساءة أو هجوم على النجم تامر حسني أو على أسرة فيلم تاج ولا للشركة المنتجة بالدليل أنا قولت تامر أخويا وحبيبي، ولكن كل ما بدر مني إني قولت إن فكرتي ممكن تكون تداولة في الوسط الفني دون معرفة أي طرف أنها تخصني، وأن تامر وصناع الفيلم لم يكن لديهم علم بأي حاجة عن فكرتي.
واستكمل التهامي: وهذا ما أوضحه أمام الجميع أنا كنت عاوز أقول إن كان ليا السبق في تقديم نفس فكرة التوأم الخارق لشركات إنتاج أخرى ولم تنفذ، ولكن تامر مبدع وشاطر وممكن تتشابه الأفكار، ولكن التناول والطرح مختلف وأنا من محبين تامر جدا على المستوى الشخصي والفني والإنساني لأنه ناجح وإنسان محترم.
وأردف التهامي: وشكرا للشركة المنتجة وبالأخص الأستاذ أحمد بدوي على اهتمامه وتواصله معايا، وأنا أوضحتله كلامي وهو أكدلي أن مفيش وجه شبه بين قصتي خلف×خلاف وقصة فيلم تاج لا في التناول ولا الطرح، وأن فيلم تاج مختلف تماما حتى في الشكل الدرامي للتوأم الخارق، وكل التوفيق لأسرة فيلم تاج وأنا لا أملك غير كل حب وأخوة واحترام لأسرة فيلم تاج كاملا، مع خالص اعتزاري عن سوء الفهم للفنان تامر حسني وجمهوره.
