بشرى: السيدات في مصر مظلومة في صناعة السينما.. ومبيفرقش اسمي أو صورتي فين على الأفيش

الفنانة بشرى 

تحدثت الفنانة بشرى، عن مدى اهتمامها بوضع اسمها وصورتها على الأفيش، مؤكدة أنها لا تهتم بهذا الأمر مطلقًا وأن ما يهمها هو المحتوى الذي تقدمه، إلى جانب حديثها عن الظلم الذي تتعرض له المرأة في مجال السينما.

بشرى تكشف رأيها في ترتيب الأسماء على أفيش الأفلام

وقالت بشرى خلال ندوة تكريمها: لا أهتم بترتيب وضع اسمي أو صورتي على الأفيش، لأن المحتوى أهم حاجة، وهو المهم بالنسبة للجمهور، فالجمهور أقسم بالله مش بيفرق معاه شكلك ولا اسمك على الأفيش، لكن الأهم بالنسبة له أنت بتقدم عمل عامل إزاي، هل الجمهور هيحبه وهيصدقك ولا لأ لأن مهم أوي الفنان يكون متصدق فيه وفنانين محترفين بس.

وأضافت بشرى: الفنانين اللي بتتصدق وعندها مصداقية قليل عند الجمهور، والحمد لله أنا الجمهور مصدقني ودي نعمة كبيرة جدا وبحسها من الجمهور، ولن أنسى تجربة الاختيار 2 وفيلم 678 وتجارب ليا حسيت الجمهور صدقني.

وتطرقت بشرى إلى الحديث عن الظلم الذي تتعرض له المرأة في السينما قائلة: السيدات مظلومة في السينما، على الرغم من أن السينما قامت على أكتاف السيدات، ومنتجات زمان هي اللي قومت السينما، والست مظلومة في صناعة السينما، ودي أزمة بنهري فيها من سنين، لأن الست مظلومة في مساحة الدور قدام الراجل وفي أجرها واسمها على الأفيش وبتاخد كام مع أن عندها كوافير ومانكير ولبس ونفخ وشد ومصاريف ودي من ضريبة الشهرة.

وأضافت: الست لازم تهتم بنفسها وتاخد فيتامينات ودي كلها مصاريف زيادة على الست لأن الست مصاريفها كتير جدا وتفاصيل لبسها كتير، ولكن الراجل بنطلون وقميص وساعة وجزمة وأخره يسبسب شعره مع شوية جيل.

وتابعت بشرى متحدثة عن الفنانة نبيلة عبيد، قائلة: نبيلة عبيد دي نجمة كل القلوب ونجمة مصر الأولى وهي نجمة قلبي، لأن محدش قدمني كما قدمتني نبيلة عبيد وحسيت أنها أمي، وطلعوا عليا إشاعة أني قريبتها وفكروا إني بنت أختها في حين أن بنت أختها أميرة هاني كانت بتمثل معايا في المسلسل، وهي أخدت بايدي، وكذلك حسين فهمي قدمني واشتغلت معاه تلات أعمال، وعزت أبو عوف كان بيقف ورايا، وميرفت أمين.

وأضافت: أنا كنت محظوظة في احترام وتقدير النجوم الكبار، وكان مشهور على الثلاثي ميرفت ودلال عبد العزيز ورجاء الجداوي أنهم مش بيفوتوا الجنازات وبيقوموا بالواجب فكنت كل ما أروح عزاء ألاقيهم مع بعض، وكانت دايمًا رجاء تقول لي هاتي كرسيكي الرابع جمبنا علشان دايمًا بكون معاهم، روحت قلت لها أنا فين وانتم فين إحنا تلاميذكم، رديت عليا وقالت انتي مش محسوبة على الجيل الجديد.

واستكملت: الكلمة دي على الرغم من أنها جاية من حد عزيز على قلبي على قد على معناها كبير عليا، فالحمد لله الجيل القديم شايفني في مكانة عالية أوي، وعادل إمام ومحمود ياسين اتكلموا عليا في برامج، وسعيد صالح أشاد بيا على المسرح وما شفتش منهم غير كل خير كشابة جديدة طالعة وظاهرة بيقدموني وحابوني وكان أحيانا حد يقول إزاي بتشتغلي مع الفنانة دي لأن طبعها صعب.