الفنانة رانيا يوسف
أكدت الفنانة رانيا يوسف، أن هناك فنانا مصريا يغير منها حتى وصل الأمر لحذف مشاهد كثير في عمل جمعهما سويا مؤخرًا، رافضة الكشف عن اسمه.
وقالت رانيا يوسف في تصريحات تلفزيونية: اشتغلت مع فنان مصري قريب وكان بيغير مني وشال نص مشاهدي ومش هقدر أقول اسمه عشان بيشوفني دلوقتي بيسلم عليا بالأحضان ومتمناش اشتغل معاه تاني.
رانيا يوسف
سبق، وتحدثت رانيا يوسف خلال تصريحات تلفزيونية أيضًا عن فكرة الحجاب، ورأيها في الطريقة التي يحكم بها الأفراد على بعضهم البعض.
وأوضحت رانيا يوسف: مبحبش أحكم على حد من طريقة لبسه، الطرحة لا هتقلل مني ولا هتزودني الواحد بيتحجب بأفكاره ومعتقداته وده رأيي الشخصي ووالدتي وجدتي مش محجبين، وأعرف ناس كبار في السن مش لابسين الحجاب.. مش بيتهيألي إني اتحجب في يوم من الأيام دي مش من أفكاري خالص، أنا مش هدخل في قصة الحجاب فرض ولا لأ أنا مش هفتي ومبتكلمش في الدين ولا في السياسة، أنا ليا حالي وحال بناتي.
وأضافت: متصالحة مع فكرة الموت، وليه ارتباطنا بـ ربنا مرتبط بالخوف، هو أنا مينفعش أحبه من غير ما أخاف وأخاف ليه؟ ده ربنا اسمه الرحمن الرحيم ومفيش أرحم منه على البشر إحنا منه وراجعين له، ليه لازم العذاب والخوف؟ ومعنديش فكرة الإلحاد أبدًا.
وعن انتقاد الجمهور لمشاهد القبلات التي جمعتها مع الفنان هاني سلامة في عمل سابقًا، ردت رانيا، قائلة: إحنا اتربينا على أفلام الأبيض والأسود وعلى المشاهد دي، أنت مش عاجبك الفيلم متتفرجش عليه، والناس بتستفز من المشاهد دي بسبب عقليتها ومعتقداتهم، وأنا مش بتحدى المجتمع المصري خالص أنا بعمل اللي يريحني، وأنا بأمن بالحرية الشخصية اللي مبتأذيش حد.
رانيا يوسف: لو محمد مختار بيصرف على بناته كنا روحنا المحاكم؟
أما عن العلاقة بين طليقها المنتج محمد مختار وابنتيهما، فعلقت رانيا يوسف، قائلة: أنا حاولت كتير نكون على ود وهو رفض، وبناتي راحوا له وهو مقابلهمش ورفض يفتح الباب وبيرجعوا يعيطوا، وبقول آه أنتم اتحرمتوا من أبوكم برضاه ومحدش بيختار أمه وأبوه، ووالدهما مبيساعدش بأي حاجة بقاله من 13 سنة ولما يقف قدام ربنا يبقى يقول أنه بيصرف.
وتابعت رانيا يوسف: لو هو بيصرف عليهما من الأول كنا هنروح المحاكم؟
وفي الآخر 10 آلاف جنيه بعد المحاكم دول هيصرفوا على بنتين؟
هو انسحب ولا كأن له بنات دا الواحد بيربي قطة بيرتبط بيها مش عارفة جاب القسوة دي منين.
