عمرو أديب قبل توقف برنامجه «الحكاية» : معرفش أزمة انقطاع الكهرباء هتنتهي في سبتمبر ولا لا

الإعلامي عمرو أديب

أعلن الإعلامي عمرو أديب، توقف برنامجه «الحكاية»، والذي يعرض على قناة «mbc مصر»، بدءًا من 1 أغسطس المقبل ولمدة شهر.

وقال «أديب»، في تعليق خلال حلقة، السبت، إنه يعمل في الإعلام منذ 25 عامًا، ويشترط في تعاقده مع أي قناة يعمل بها الحصول على إجازة مطلع شهر أغسطس، من الراحة والاسترخاء.

وتابع: «أنا السنة دي زي الـ25 سنة اللي فاتت، هطلع إجازة علشان محدش يقول من الجماعة اللي انتوا عارفينهم عمرو أديب هرب ومش عارف إيه.. لو ليا عُمر هرجع لحضراتكم تاني، ولو فيه أي حاجة هقطع الإجازة وارجع تاني».

تصريحات عمرو أديب 

من جانبه، كان قال عمرو أديب بعد عقد الدكتور مصطفى مدبولي ، رئيس الوزراء مؤتمرا صحفي وأعلن فيه عن جدول الانقطاعات للكهرباء: ” الشعب المصري مش طفل.. ولما رئيس الوزراء طلع قال ان الازمة هتتحل منتصف الاسبوع مكنش يعرف إنها مطوله”.

وتابع عمرو أديب فى برنامجه،” صارحوا الناس وقولولهم الحقيقة هو رئيس الوزراء طالع يمن علينا بانجازات.. نحمد ربنا على إيه ان الكهرباء بتقطع 3 مرات فى اليوم”.

عمرو أديب ينتقد عدم تمكن مجلس النواب من الانتهاء من تعديلات قانون التصالح في مخالفات البناء

هذا وانتقد الإعلامي عمرو أديب، عدم تمكن مجلس النواب من الانتهاء من تعديلات قانون التصالح في مخالفات البناء، خلال دورة المجلس الثانية.

وقال أديب خلال تعليق ببرنامجه «الحكاية» عبر قناة «mbc مصر»، الإثنين: «الناس كانت بتجري ورا الحكومة عشان يدفعوا فلوس التصالح من أجل توفيق أوضاعهم، الدولة على الأقل كان هيدخلها في الموضوع ده 100 مليار جنيه على الأقل، غير وجود ملفات وأكواد للبيوت وغير هذه الأشياء».

وأضاف: «لكن لسبب أو لآخر، القانون لم يصدر من مجلس النواب، إن شاء الله نستنى للدورة اللي جاية، في ناس في البلد بيشعروا إن عندهم الوقت كله، الناس بتجري وراك عشان ياخدوا استمارة 10 ويدفعوا الفلوس».

وتابع «أديب»: «عندك 100 مليار بتوع مصالحات البناء، وعندك 100 مليار بتوع فروق السجائر، إنتوا أغنياء أوي للدرجة، مدام مديحة اللي في الدور التالت تعوق دخول مليارات إلى خزانة الدولة، دول اللي إحنا نعرفهم، آدي 200 مليار، مش كانوا ممكن يعملوا حاجة في البلد، الموضوع كله هتلاقيه واقف عند موظف حكومي موقف المراكب السايرة. جايز في حاجة أنا مش فاهمها، أو حكمة ما أنا مش عارفها».

وتابع أديب: «كنت بتقولي خلال يومين، وبعدها بتقولي سبتمبر، أنا إيش عرفني!! أنا معرفش أزمة انقطاع الكهرباء هتخلص في سبتمبر ولا لأ، أرجو تعديل الخطاب مع الناس، الشعب المصري ليس طفلا، ده عمره 7 آلاف سنة، حكيم وصبور».