الفنان هشام ماجد
كشف الفنان هشام ماجد عن حقيقة وجود تشابه بين فيلم «باربي» وفيلمه «فاصل من اللحظات اللذيذة» المقرر عرضه في عيد الفطر 2024، حيث جاء ذلك التساؤل بعد التشابه بين الفنانة هنا الزاهد وشخصية باربي في بوستر الفيلم .
و قال هشام ماجد في تصريحات لـ «et بالعربي»: «لا يوجد أي علاقة بين فيلم باربي وفيلم فاصل من اللحظات اللذيذة، لأن قصة الفيلم مختلفة تمامًا».
تدور أحداث الفيلم في إطار اجتماعي كوميدي، ويجسد خلاله هشام ماجد شخصية مهندس معماري متزوج من هنا الزاهد، ويعيشان معا حياة تعيسة، إلى أن يواجهان مفاجأة تغير حياتهما، وتقلبها رأسًا على عقب.
الفيلم من بطولة الفنان هشام ماجد وهنا الزاهد ومحمد ثروت ومن إخراج أحمد الجندي وتأليف شريف نجيب وإنتاج أحمد السبكي .
وكان قال هشام ماجد: وقت لما كنا بنعمل رجال لا تعرف المستحيل كنا بنهزر ومكنتش أتوقع إننا نوصل لكل ده، لأن عمري ما كان حلمي إني أكون ممثل، بس مع الوقت بتكتشف جواك مواهب مكنتش عارف إن هي عندك، وابتدينا في الجامعة نعمل رجال لا تعرف المستحيل وانتشر جدا وكنا بنعمل أفلام قصيرة، ومن فيلم للتاني حبينا الشغلانة وبدأنا نشتغل على نفسنا، وإحنا أول ناس تعمل السينما المستقلة بكاميرا فيديو.
وتابع: اتخرجت من هندسة وابتديت اشتغل مهندس ونسيت التمثيل شوية، لغاية ما جت فرصة في التانية وكنت بعمل الأفلام دي وأنا لسة في الهندسة، لغاية ما اكتشفت إن التمثيل هو الكارير بجد، والموضوع مش مجرد هزار، ده هيبقى أكل عيشي فعلا، فـ سبت هندسة وبدأت أركز في التأليف والتمثيل.
وأضاف: فيلم ورقة شفرة ده بعتبره ابني البكري، وفي العرض الخاص بتاعه، مكنتش مصدق إني شايف نفسي على شاشة كبيرة قدامي وبقول هي الناس دي بجد بتتفرج وبيضحكوا بجد ولا بينافقونا؟ وكان إحساس غريب لما الناس بدأت تسقف، فالفيلم ده كان أغلى فرحة عندنا في كل أفلامنا.
واستطرد: مُقل شوية في التأليف لـ غيري، عشان خلاص بقيت عايز أعمل حاجات لنفسي، فالتأليف لحد تاني بياخد وقت كتير ومجهود ذهني كتير، وبيبقى في تضارب مصالح، يعني ممكن أكون بكتب وألاقي إيفيه عجبني، أقول طب ما أنا اللي عايز أقول ده، فركزت مجهودي في التأليف لنفسي.
وأردف: أنا وأحمد فهمي كنا كاتبين جزء من فيلم بوشكاش قبل ما نعرف إن محمد سعد اللي هيعمله، فلما عرفت إننا هنعملهوله، فرحت فرحة غير عادية، أنا بحبه وهو قعدته حلوة، ودخلتله فيلم بوحة 3 مرات.
واستكمل: بس ساعتها محمد سعد قالنا الفيلم ده مش هيتكتب كدة، إحنا نطلع إسكندرية، وفعلا طلعنا وفضل كل يوم يجيبلنا سمك وجمبري ونقعد ناكل ونكتب وخلصنا الفيلم.
واختتم هشام ماجد حديثه قائلًا: بصور حاليًا فيلم اسمه فاصل من اللحظات اللذيذة، هو فيلم كوميدي من إخراج أحمد الجندي ومعايا هنا الزاهد وبيومي فؤاد ومحمد ثروت والطفل جان رامز، وأضاف هشام مازحًا: جان ده طفل في التلاتين من عمره.
