المصري تامر حسني
تحدّث النجم المصري تامر حسني عن موقف غير متوقّع تعرّض له أثناء سفره مع اثنين من أعضاء فرقته بسبب تأخّر الطائرة لأكثر من 9 ساعات.
وروى الفنان تامر حسني تفاصيل ما حصل معه عبر انستغرام، قائلا: “الطيارة اتأخرت والجوّ من برد جداً لحرّ جداً… من حقي أعرف أنا في أي فصل في المطار ده؟”.
وتابع تامر حسني قائلاً “عملت كل حاجة، نمت وصحيت واتعرفت على أجانب كتير وبنحضّر مشاريع دلوقتي ولسّه الطيارة مجاتش… على كلٍ ده بقى وتخيلوا أروح ملاقيش حد عارفني في بونتكانا. اكرم يا رب”.
وختم حسني منشوره بالقول “بس دي كل قصتي في الـ ٨ ساعات اللي بقوا ٩ ساعات، يلا سلام يا شباب بيقولوا الطيارة وصلت وأي جديد هعرفكم سلام”.
نصيحة تامر حسني لجمهوره في منتصف شعبان
وكتب تامر حسني في منشوره: صباح الخير على أغلى الناس معلش بعد إذنكم اقرأوا كلامي للأخر، نص شهر شعبان، من النهاردة لبكرا أعمالنا بتترفع لربنا يعني كلنا نلحق نستغفر ونطلب من ربنا يسامحنا محدش يتخيل أنه عمل أخطاء كتير فمالوش عين يطلب لا لا لا مهما عملت أطلب حالاً وياريت لو نصوم بكرا أنا هعمل كده أي حد عنده شغل ياريت يفضي شوية وقت عشان يستغفر ويدعي كتير بقدر الإمكان.. اليوم ده ليه سحر وأنا جربته كتير قبل كده وهتحسوا في قلوبكم أن في حاجة اتشالت من عليكم وبقيتوا مبسوطين أكتر، ادعوا بكل اللي تتمنوه أوي أوي.
وتابع: فرصه لأي حد عمل ذنب كبير غصب عنه أو قاصد بس ندمان فرصه أن ربنا يسامحه دلوقتي بس نفتكره ونطلب منه يلا يا جماعة من دلوقتي لبكرا اعتبروا أن ده يوم بسنه كامله وجايز بكرم ربنا يبقى يوم بحياتك كلها اجتهدوا فيه أوي من صلاه من تصدق من ذكر من دعاء من صلة رحم، اليوم ده تقدر من خلاله تبدأ صفحة جديدة مع نفسك ومع ربنا أوعى تحس أنك بعيد ومتسمعش كلام اي حد يقولك يا عم انت بتعمل وبتعمل قوله ملكش دعوة ليا ربنا هيحاسبني مش أنت ونخلي عندنا يقين مش عادي ركزوا على كلمة يقين مش عادي أن ربنا سامعنا وهيستجيب لنا وهيحققلنا اللي بنتمناه، واللي هيكون صالح لينا و هيسامحنا، عشان تفرق كتير أوي لو بتدعي وعندك يقين أو معندكش بتفرق كتير أوي صدقوني، ومتنسوش تدعولي معاكم بعد إذنكم محتاج دعواتكم جداً.
وكانت آخر أعمال تامر حسني في السينما فيلم “تاج”، وهو من تأليف وبطولة تامر حسني، وإخراج سارة وفيق، وشاركه في بطولته دينا الشربيني، وعمرو عبد الجليل، وهالة فاخر، وساندي.
