سماح أنور عن اعتذار كاملة أبو ذكري لها: ملوش داعي.. ومعندهاش مبررات مهنية كافية

الفنانة سماح أنور

حرصت الفنانة سماح أنور الرد على اعتذار المخرجة كاملة أبو ذكري لها، على حذف مشاهدها في فيلم يوم للستات، وذلك من خلال تسجيل صوتي نشرته عبر حسابها الشخصي على موقع تبادل الصور والفيديوهات إنستجرام.

رد سماح أنور على اعتذار كاملة أبو ذكري لها

وقالت سماح أنور في التسجيل الصوتي الذي رصده موقع الأجواء: في بيان اتطلب مني من فترة، كانت طلعت الاستاذة كاملة أبو ذكري اعتذرت في برنامج عن موقفها من حذف دوري في فيلم يوم للستات، الحقيقة شكرا ميرسي، ولو أن أنا مش فاهمة الاعتذار ليه حالا دلوقتي، مع أن الموضوع بقاله كذا سنة، وأنا مشكلتي في الاعتذار حاجة واحدة أنه الأستاذة كاملة أصرت أنها تشرح الموقف بأنها تطعن في مهنيتي أنا ودا الطريق الوحيد، أنا بعذرها طبعا لأن هي معندهاش مبررات مهنية كافية أو منطقية تقولها.

وتابعت: حكاية أني عملت حاجبي تاتو دي ولبسوني باروكة دا مكانش بناء على طلبي، أولا حواجبي مش معمولة تاتو، وهي جات مع المساعدين بتوعها والماكيير عشان يعملولي تيست وعملت حواجبي قدامهم وقالت هايل، والدور دا أنا بعمله من غير مكياج.

سماح أنور: أرفض الطعن في مهنيتي

واضافت سماح أنور: وأنا أرفض الطعن في مهنيتي أنا ست التزمت لمدة سنتين بخمس مشاهد كان ممكن يخلصوا في يومين تلاتة، تم تصويرهم على سنتين، وكانوا بيمشوني من غير ما أصور، وأخطاء كتيرة جدا تسبب فيها كاست الإخراج، ويليهم كاست الإنتاج.

واردفت: وكاملة أبو ذكري هي أولى بالاعتذار لنفسها، لأن هي السبب في هذه الأزمة، وهي لم تفي بأنها تقول حاجة أي حد يفهمها، لكن للأسف فشلت للمرة التانية في أنها تتكلم بصدق عن الموضوع، وأنا عارفة أني كنت عاملة دور عظيم بشهادة المونتير.

سماح أنور: كاملة أبو ذكري فشلت فشلا ذريعا في الاعتذار

واختتمت سماح أنور: كاملة أبو ذكري فشلت فشلا ذريعا في الاعتذار المتأخر وملوش داعي لأن الخطأ أكبر من الاعتذار، وأن حد يشيل دور ممثل مهم من غير ما يقولولوا، أنا لقيت صحفي بيقولي احنا كنا في العرض الخاص بتاع يوم للستات هو حضرتك في الفيلم ؟ لأن احنا ملقناكيش خالص في الفيلم.