غادة عبد الرازق في أبرز تصريحاتها التليفزيونية: بيضحكوا على محمد رمضان وبيقولوا إنه بيحقق أعلى إيرادات

الفنانة غادة عبد الرازق

تحدثت الفنانة غادة عبد الرازق عن أكثر الأعمال التي ندمت عليها في مسيرتها الفنية، وعن أكثر نجم يحقق إيرادات في السينما المصرية، وعن رأيها في مهنة الرقص الشرقي.

أبرز تصريحات غادة عبد الرازق التليفزيونية

ـ مسلسل حدوتة مرة من أكتر المسلسلات اللي كسرت الدنيا ليا.

ـ أنا شخصيتي مستفزة يمكن للآخرين.. ولو قولت أجري ده يستفز الناس وبخاف من الحسد.

ـ بنتي روتانا وأحفادي أهم من أي حاجة.. وكنت بسيب بنتي وأروح التصوير.

ـ ندمانة على فيلم كارما ومحبتوش.. وعلاقتي بـ هيفاء وهبي كويسة وهي بتعمل مجهود في شكلها ومجالها وعملت بصمة في التمثيل.

ـ أنا ست عملية وجوا المطبخ وبعرف الإيرادات وبسمع اللي بيحقق إيرادات أكتر كريم عبد العزيز.

ـ يمكن بيضحكوا على محمد رمضان وبيقولوا ليه بيحقق أعلى إيرادات. 

ـ لو في عمل حلو مع محمد رمضان معنديش مانع اشتغل معاه وهو موهوب.

ـ يسرا كل الدنيا بتحبها ومن العالم ومن أول ما طلعت كان نفسي ابقى زيها.. وبتقولي دايما أني شاطرة وموهوبة.

ـ مهنة الرقص الشرقي مش بتليق بالرجالة.. وبستفز لما آلاقي رجل بيرقص دي مش عنصرية لما الراجل يهز وسطه الست تعمل ايه؟!.

ـ لو هغير حاجة هتكون التسرع ومعشتش حالة الأمومة مع بنتي.

ـ هرفض أعمل تاني دور مثلية جنسية لأني مش بكرر دور عملته ونجحت فيه.. أنا خدت سقف النجاح فيه.

وقالت غادة عبد الرازق في تصريحات تليفزيونية: اسمي ارتبط بالأفلام الجريئة بعد فيلم الأجندة الحمراء، والارتباط ده ظلمني وخلاني لمدة 6 سنين بيصنفوني إغراء، وبذكاء مني بدأت اختار أدوار تانية وعملت مجهود جامد علشان أغير النظرة دي.

أما عن نجاحها في مسلسل مع سبق الإصرار، أضافت غادة عبد الرازق: كان عندي غرور رهيب بعد نجاح مسلسل مع سبق الإصرار، وحسيت إن الدنيا كلها مفيهاش غير غادة عبد الرازق بس، والشهرة لما بتزيد عن اللزوم بتغربل حياة البني آدم، وأنا دلوقتي معنديش أصحاب.

غادة عبد الرازق: استعنت بطبيب نفسي

كما تحدثت الفنانة غادة عبد الرازق، عن تفاصيل استعانتها بطبيب نفسي، قائلة: استعنت بالدكتور النفسي من وقت ما شوفت بنت خلصت حياتها بإيديها.. وطول عمري باخد مهدئات وأنا بخاف من الوحدة، وربنا مبيديش كل حاجة، وأكيد أنا واخدة الـ 24 قيراط زي ما مكتوب ليا، ولو ربنا كاتبلي أن الـ 24 قيراط بتوعي بالمرض النفسي فأنا راضية.

غادة عبد الرازق في رمضان 2024

وتخوض الفنانة غادة عبد الرازق السباق الرمضاني المقبل 2024 من خلال مسلسل صيد العقارب، في عمل من بطولة رياض الخولي، محمد علاء جامايكا، سيمون، فريد سيف النصر، عماد صفوت، أحمد ماهر، ميار الغيطي، سامية عاطف، مجدي بدر، أحمد ماجد، وغيرهم من الفنانين.