المنتج حمادة إسماعيل بعد الهجوم على بيومي فؤاد: «ما يحدث إرهاب وتخويف للفنانين المصريين»

المنتج حمادة إسماعيل

علق المنتج حمادة إسماعيل، رئيس إحدى الشركات المتعاونة مع موسم الرياض، على الانتقادات والهجوم التي تعرض له الفنان بيومي فؤاد مؤخرا، بسبب تصريحاته بعد عرض مسرحية «زواج اصطناعي».

وقال حمادة اسماعيل خلال مداخلة هاتفية مع الإعلامي عمرو أديب ببرنامج «الحكاية»: «هتكلم بعقلانية شوية عشان الموضوع أصبح ماسخ، انا بشتغل في السعودية أكثر من 7 سنوات، ومع العشرات من الفنانين، والفنان بيتقدمله الدعوة وبيطلع على أحسن مسرح وديكور، والناس تعاملنا معاملة جيدة جدا يستحقها الفنان المصري».

وأضاف: «الفنان المصري أول من يكرم، والناس تستقبلنا بأسلوب لائق ومرحب وبشهادة أي فنان مصري، واللى بيحصل حاليا تخويف، بتخوفونا ليه؟ إيه الغلط اللى بيعمله الفنان».

وتابع: «الفنان بيقدم شغله، بيجي المملكة يكرم في أي حدث ويحصل الفنان على فرص في عمله، ومن حقه أن يقدم الشكر، وده بيحصل في كل البلاد العربية».

واختتم حديثه قائلا: «فجأة الناس تطلع تهاجم بشكل صارخ ليه؟ قال ايه غلط، وأي فنان مش عنده رايه مش عايز يطلع في أي فترة ومش عايز يقدم شغله هو حر، لكن أن الناس تتفق معاه ومحدش يشتغل ليه؟ الكل عارف الحالة الاقتصادية».

عمرو أديب مدافعًا عن بيومي فؤاد

وعلق الإعلامي عمرو أديب على الهجوم الذي تعرض له الفنان بيومي فؤاد، وقال خلال برنامجه «الحكاية» المذاع عبر قناة MBC مصر: «إيه اللي بتعملوه مع بيومي فؤاد ده هو الراجل عمل إيه، وإيه الشتيمة دي، ده لو عرض المسرحية في إسرائيل مكانش عملتوا معاه كده».

وأضاف: «عايز أسأل ضميركم سؤال، لو إنت متضايق من بيومي فؤاد، وشايف إنه عبدللفلوس والمادة ومش شايف فلسطين، هل اللي إتعمل فيه النهاردة قد اللي عمله، وهذا العقاب الجماعي الأسطوري على كلمتين قالهم على المسرح، أول إمبارح كان في سبع مطربين مصريين في أبوظبي بيغنوا ولا حد قرب لهم، وغيرها ممن حفلات تانية».

تابع: «موسم الرياض مستمر ولن يتوقف، وبصراح الموضوع مشبوه جدا، الموضوع مش بيومي فؤاد، ده راجل ممثل بنحبه ومصري، يروح هناك وسط الناس يلاقي بلده بتشتمه».

تصريحات كاملة أبو ذكري

والجدير بالذكر أن كاملة أبو ذكري هاجمت بيومي فؤاد عبر حسابها الرسمي بموقع تبادل الصور والفيديوهات الإنستجرام بسبب هجوم على محمد سلام، وقالت كاملة أبو ذكري: “الأستاذ الفنان اللي كنت واحدة من محبيه.. لو حضرتك فاكر إنك لما تعمل عمل اتحضر واتكتب واتنفذ في 3 أيام.. وتروح تعرضه وترقص وتغني وتضحك وبعد كده تأخد آلاف الدولارات.. لو ده بتسميه فن فأنا لا يشرفني إني أكون زميلة لك في هذه المهنة، لما تكون بتعرض التفاهات دي.. ده لا يشرف الفن المصري، ولما تعرض التفاهة دي وجارك بيدبحوا أطفاله ونساءه ورجاله وتقولي الفن.. يبقي ماعنديش كلام أقدر أقوله غير إن.. الإحساس والفن نعمة أنتم آخر ناس تتكلموا عنها”.