أسما شريف منير: انتظمت في الصلاة بعد أحداث غزة ونفسي أتحجب.. خايفة أموت وأنا مش جاهزة

التجميل أسما شريف منير

تحدثت الإعلامية وخبيرة التجميل أسما شريف منير، عن الحجاب وخوفها الدائم من الموت، مؤكدة أنها انتظمت مؤخرًا في الصلاة، ولكنها مازالت مترددة في ارتداء الحجاب.

وقالت أسما شريف منير في بث مباشر عبر حسابها الشخصي بموقع انستجرام: من ساعة اللي حصل في غزة وأنا خدتها عند مع نفسي والتزمت في الصلاة وبقالي 15 يوم ملتزمة وقللت خروجي جدًا ودي حاجة مريحاني جدًا، وكل مرة الصلاة بتريحني وبتلهي في الدنيا ولكن دلوقتي بحاول، ونفسي انتظم على الصلاة لغاية ما أموت.

وتابعت متحدثة عن سبب عدم ارتدائها الحجاب: الواحد يلتزم في الصلاة الأول وبعدين يغطي شعره، نفسي أعمل كده وربنا يهديني للحجاب وأنا خايفة أعمل حاجة تكون مثال مش كويس للحجاب، ودايمًا الواحد لما بيبدأ في الخيط الأولاني ومينفعش تنفره في الحاجة دي، ولازم دايمًا لما تشوف حد بيعمل حاجة ساعده وادعيله بالهداية، ولو أنت شايف حد أبو لهب افتح نفسه على الدين، واقتضى بالرسول عليه الصلاة والسلام.

وكشفت أسما شريف منير عن خوفها الدائم من الموت قائلة: بعد ما التزمت بالصلاة حسيت إني ممكن أموت عادي، أنا دايمًا خايفة من الموت لأني دايمًا حاسة إن ناقصني حاجات كتير قوي ومش عارفة هقف إزاي قدام ربنا، خايفة أموت وأنا مش جاهزة.

وأضافت: ربنا يثبتني على الصلاة دايمًا والواحد نفسه السيئة والشيطان ساعات كتير بيدمر العلاقة اللي بيني وبين ربنا، وبحس إني لما بصلي بكون هادية وربنا هاديني وفي حد في ضهري ومفيش حد هيأذيني وعندي ثقة إن ربنا معايا.

أسما شريف منير حليقة الشعر 

ومن جهة أخرى، أثارت أسما شريف منير جدلًا واسعًا عبر مواقع التواصل الاجتماعي خلال الفترة الماضية بعد ظهورها حليقة الشعر، وتعرضت أسما للعديد من التعليقات اللاذعة المنتقدة إطلالتها الجديدة التي شبههوها بالرجال.

ونشرت أسما ستوري على انستجرام موضحة به سبب ما فعلته، حيث قالت: القرار مش سهل خالص، وحاسة إني أنا ببتدي حاجة جديدة من الأول، وشعري كان بيقع بطوله، لأن أنا عندي الغدة وهي مش متظبطة فكان بيقع كتل، بس فيع جزء منه إني ببتدي من الأول الشعر هيطول، بنت عمتي عملتها وشعرها طول وبقى صحي أكتر وأحسن بكتير، حاسة إنه قرار كبير بس خلاني حرة.

ودعمها والدها الفنان شريف منير، حيث نشر فديو للدفاع عن ابنته، قائلًا: اللوك اللي عملته عاجبني وأنا مبسوط منها أوي بس قبل ما الإخوة السادة الملائكة الصالحين اللي عمالين يقلوا أدبهم ويشتموا وبيقولوا تاخد التريند وجاتها البلاء في شكلها وبيقولوا أبوها معرفش يربيها لا أنا بنتي متربية كويس جدًا بس هي بتتصرف باللي هي حاسة بيه المهم إنها متكونش بتأذي حد.

وتابع شريف منير: قبل ما تتكلموا بصوا على نفسكم واتفرجوا على عيلتكم وعلى إخواتكم وعلى الناس اللي حواليكم قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية لا أنا بنتي متربية كويس جدًا.

ولم يكن الفنان شريف منير والد أسما الوحيد الذي دعمها، ولكن تلقت أسما دعم من ابنتها لارا عبر حسابها على انستجرام: كل مَن يهاجم والدتي عبر مواقع التواصل الاجتماعي يحتاج إلى نمو عقلي، والدتي لا تؤذي أحدا وهي امرأة ناضجة تتخذ القرار الذي تريده خاصة أنه جسدها، والدها الفنان شريف منير يوافق على شكلها الجديد ويحبه لأنه أب عظيم، كرهك لوالدتي لا يؤثر عليها لذا توقف عن المحاولة فهي امرأة شجاعة، والدتي تلهمني بشكل يومي وفخورة أنها رائعة إلى هذا الحد.