لقاء سويدان: أتمنى مناقشة قوانين الأحوال الشخصية بأعمال فنية.. وأنا ضد الست اللي بتستقوى على الراجل

الفنانة لقاء سويدان

كشفت الفنانة لقاء سويدان عن القضايا التي تتمنى أن تناقشها في عمل فني، بجانب الحديث عن مواصفات تتمناها في زوجها المستقبلي.

وقالت لقاء سويدان في لقاء خاص: أنا شايفة إن فيه قضايا لحقوق الطفل والمرأة في حاجات كتير في محاكم الأسرة محتاجة تعديلات، وأنا مش عايزة حقوق زيادة للست وأنا ضد الست اللي بتستقوى على جوزها أو اللي تعمل قضايا أو اللي بتقول مش واجب عليا، ولكن أقصد قضايا الأحوال الشخصية.

أما عن المواصفات التي تتمنى تواجدها في زوجها المستقبلي، فعلقت لقاء سويدان قائلة: يكون راجل بيتقي الله لأن اللي بيخاف من ربنا وبيعبده حق عبادة هيتقي الله فيا، ويكون رومانسي ويكون شخصية قوية وواثق في نفسه مش بيستقوى على الست، وتبقى قوته في أنه يبقى حنين مش بالعنف.

لقاء سويدان: معظم الفنانين الكبار بيموتوا فقراء

وسبق وأن طالبت الفنانة لقاء سويدان، بالالتفات لحياة الفنانين ومساعدتهم بمدهم بامتيازات خاصة، قائلة: مش كلنا عندنا طيارات خاصة، إحنا مش مليونيرات، وحتى الناس اللي عندها طيارات خاصة عندهم مشاكلهم الشخصية والعائلية.

وتابعت: معظم الفنانين الكبار بيموتوا فقراء، النقابة آه عملت دار مسنين، بس لسه فيه مشاكل كتير للفنانين محتاجة تتعالج، ممكن أخلي فيه سن معين للفنانين يبقى معفي من حاجات كتير زي أي مواطن، عايزة من الدولة زي ما الفن قوة ناعمة، يبقى من حق الفنان يكون له امتيازات ولو بسيطة.   

 وأوضحت لقاء سويدان: فكرت كتير أعمل مشروع، بس مش قادرة أعمل مشروع كبير، وبتيجي عليا أوقات كتير مشتغلتش بس بعمل حاجات تانية، بدرس، أنا الأولى على دفعتي وورحت درّست دراما في دبي مع وزارة التربية والتعليم هناك وكانت تجربة مهمة، كنت بدرس دراما مش كورسات، وأنا ممكن أعمل أي حاجة ما دام هي حلال.

 أعمال الفنانة لقاء سويدان

انتهت لقاء سويدان مؤخرًا من عرض الموسم الأخير من مسرحية سيد درويش، مع الفنان ميدو عادل، وهي من تأليف سيد إبراهيم وتحت قيادة المخرج أشرف عزب، وجسدت خلاله دور الراقصة جليلة التي أحبها وتزوجها الموسيقار الراحل سيد درويش.