الفنانة إسعاد يونس
روت الفنانة إسعاد يونس ذكرياتها مع نصر أكتوبر المجيد يوم 6 أكتوبر سنة 1973، وذلك خلال مشاركتها في الندوة التثقيفية لاحتفالية الذكرى الخمسين لنصر أكتوبر، التي أقيمت بحضور الرئيس عبد الفتاح السيسي.
وقالت إسعاد يونس، إنها كانت أهم شخص في هذا اليوم في الإذاعة، متابعة: يوم 6 أكتوبر 10 رمضان الساعة 2 الضهر، اتقال بيان عسكري قلب الدنيا ورج المبنى ورج مصر كلها زلزال سعيد وزلزال من الفرحة والزغاريد، وأنا كنت أهم واحدة في الإذاعة اليوم ده، مش لأني مذيعة مهمة ومخضرمة ولا هقرأ بيان عسكري، لأني كنت مرمطون الإذاعة بيعلموا فيا اللي هما عاوزينه، اطلعي وانزلي.
وأضافت إسعاد يونس، أن استوديو الموسيقى والغناء، كان مليئًا بالفنانين والمطربين، مثل عبد الحليم حافظ وشادية وصلاح جاهين والأبنودي، متابعة: كانت هناك حالة زخم عظيم ورهيب، والفن اللي طلع منهم في الكام ساعة وفضل عايش لحد النهارده مش وليد اللحظة.. ولكن هما كانوا مستنيين طول الست سنين حلم وعايشين على أمل والأعمال الفنية بتتكون جوه نفسهم.. علشان كده خرجوها بالسرعة والإنجاز ده والعظمة دي.. والناس دي عمرها ما سلمت ولا يئست.
ووصفت إسعاد يونس الجيش والشعب بأنهما مثل العاشق والمعشوق، قائلة: كلنا جوه بعض ولاد بعض وأحفاد بعض وأعمام بعض.. استحالة يصدقوا أن فيه يأس ممكن يحصل وطول الوقت كان فيه أمل علشان كده الأعمال دي طلعت بالنجاح ده.
وتحدثت إسعاد يونس عن والدها الراحل، قائلة اسمحوا لي بمقدمة صغيرة: أنا بنت ظابط طيار حربي كنت بقول عليه قمر الزمان لأنه كان بيمثل لي كل معاني الفروسية والنبل والشجاعة والصدق والأمانة والبسالة، وكان ملخص المؤسسة العسكرية اللي كان بيشرف بالانتماء ليها، اتوفى سنة 1965 وكان شاب صغير وأنا كنت طفلة صغيرة، ومن وقتها فيه حلم بيجي في دماغي كل يوم وهيفضل يجي في دماغي يقظة ونوم لآخر العمر، وهو أني أكون موجودة في مكان وألاقي أبويا داخل عليا فاطنطط وأفرح وراسي تخبط في السقف وأقول بابا جه، لأن بابا جه كان ليها معنى مزدوج لأنه كان طيار يعني راجع منصور وسالم، وأنا عارفة أن الحلم ده عمره ما هيتحقق في الواقع.
وأضافت إسعاد يونس: لكن كان بيونسني أنه كان جمبي في مخدتي على سريري بسمع صوت نفسه بصوت واضح وبسمع صوت نفسه جمب المخدة لساعات طويلة وقالوا عليا اتجننت، بس والله ما كنت اتجننت أنا فعلا كنت بسمعه ولكن والغريب أنه من 1967 لـ 1973 النفس ده ما كنش مبسوط كان حزين متقطع بيأن وبيوجعني.
وأكملت إسعاد يونس: نرجع لستة أكتوبر، أنا كنت في مربع مهم في إذاعة الشرق الأوسط وفي اليوم ده كنا 10 رمضان كان بقالنا 9 أيام بنذيع برامجنا عادي جدًا، وفي الوقت ده كنا بنذيع مسلسل أرجوك لا تفهمني بسرعة وكان ناجح جدًا، يوم 6 أكتوبر 10 رمضان الساعة 2 الظهر، اتقال بيان عسكري قلب الدنيا ورج المبنى ورج مصر كلها زلزال سعيد وزلزال من الفرحة والزغاريد، زي ما بيقولوا الواحد نفسه ردت ليه.. بسرعة ناس بتتحرك وبيانات بتتحضر وبرامج بتتغير
