الفنانة إلهام شاهين
كشفت الفنانة إلهام شاهين، عن إمكانية عودتها للإنتاج من جديد، مشيرةً إلى أنها تحاول في الفترة الحالية تجميع أموال من أعمالها الفنية التي تمثل بها، ومن ثم تستغلها في الإنتاج.
وقالت إلهام شاهين في تصريح خاص: أنا مفلسة لما أحوش شوية فلوس، مانا بشتغل وأحوش فلوس عشان أصرفها على الإنتاج وأخسرها.
وأضافت: نفسي أنتج لكل الفنانين والله العظيم، نفسي أعمل فيلم يضم كل النساء أنا وليلى علوي وهالة صدقي ويسرا ومنى زكي ومنة شلبي وهند صبري، وهلم كل النجمات.
وأضافت إلهام شاهين: مبسوطة إني أنتجت، ومكسبي الأدبي أكبر من أي شيء، الفلوس بتروح وتيجي لكن أدبيًا هو ده الأهم، وزي ما السينما عملتلي حاجات حلوة في حياتي، أنا كمان عايزة أقدملها أفلام حلوة تبقى قيّمة وتنافس في مهرجانات دولية وتاخد جوائز واسم مصر يفضل ديمًا فوق، ده أكبر مكسب ليّا.
إلهام شاهين عن تكريمها في مهرجان الإسكندرية السينمائي: حاسه اني عروسة
وفي سياق مختلف، تم تكريم الفنانة إلهام شاهين بمهرجان الإسكندرية السينمائي لدول البحر المتوسط بدورته الـ 39، وأعربت إلهام شاهين عن سعادتها بهذا التكريم، أثناء إلقاء كلمتها على مسرح مكتبة الإسكندرية، المقام بها حفل افتتاح المهرجان، وقالت: حاسة إني عروسة وصاحبة الفرح.
وأضافت إلهام شاهين: مش عارفة أعبر عن سعادتي النهاردة إحساس جميل جدًا، وكل مهرجان سينما بيتعمل هو عُرس للسينما.
وعن نجاح حكاية ألفريدو، أردفت: كل شوية بقول مفيش دور جديد، فبلاقي الزهايمر متعملش فاعمله، وقبل ألفريدو قولت مفيش حاجة جديدة فلقيت زعيمة داعش، مازالوا بيفاجئوني إن فيه أدوار أنا معملتهاش، نفسي اعمل كل الأنماط اللي في الحياة بس يهمني تكون جديدة.
وتابعت إلهام شاهين: كان فيه متربصين كتير مستنيين أول حلقة عشان يهاجموا لأن فيه ناس هاجمت قبل ما ينزل المسلسل اول ما نزل البوستر فاتكبسوا كبسة وكتبوا احلى كلام واعتذروا جميعًا انا بشكرهم على العموم، ارائي ومواقفي ممكن متريحش ناس فبتخلقلي أعداء.
أما عن رأيها في مصير عدد من النجوم الذي صاروا على نفس نهجها ولكن كانت عواقب صراحتهم وخيمة، أضافت إلهام شاهين: لالا أنا أكبر من كده بكتير، الآراء على السوشيال ميديا لا بتقدم ولا بتأخر شكرًا لكل واحد بيهتم وبيشوف ويكتب رأيه اللي عنده حاجة حلوة يقولها واللي معندوش ميشوفهاش، هو حد فرض عليك حاجة؟
واختتمت إلهام شاهين حديثها، قائلةً: أنا بنصح اللي متضايق من فنان ميشوفوش ويريح دماغه، يعني تتفرج وتهاجم؟؟ أنا معنديش مشكلة مع النقد الحقيقي أنت لو شايفني مش بمثل كويس أو مهتمتش بدوري أو شكلي الخارجي مش مناسب للشخصية أو النص أنقد، لكن ياريت بيعرفوا ينتقدوا.
حكاية ألفريدو
تعرض حاليًا حكاية ألفريدو بطولة إلهام شاهين على شاشة قناة ON، وهي إحدى حكايات مسلسل 55 مشكلة حب، ويشاركها في الحكاية العديد من الفنانين، منهم: ندى موسى، أحمد فهمي، أمير شاهين، أحمد فريد، فتوح أحمد، عابد عنان، إنجي كيوان، محمد السويسي، محسن صبري، ياسمين بن داود، روان الغابة، والحكاية من تأليف عمرو محمود ياسين، وإخرجا عصام نصار.
