غادة عبد الرازق لمروجي شائعة اعتزال الفنان عادل إمام: حتى وهو قاعد في بيته تاعبهم

الفنانة غادة عبد الرازق

علقت الفنانة غادة عبد الرازق، على انتشار شائعات حول اعتزال الفنان عادل إمام، بجانب كشفها عن تفاصيل فيلمها الجديد، وتعليقها على الهجوم الذي حدث على فيلم مرعي البريمو لـ الفنان محمد هنيدي.

غادة عبد الرازق: عادل إمام وهو قاعد في بيته مضايق الناس وقالقها

وقالت غادة عبد الرازق خلال تصريحات تليفزيونية، عن شائعات اعتزال عادل إمام: بضحك لما بشوف الكلام ده، وبعدين مين أصلا يتكلم عن عادل إمام، يعني لما حد ييجي ويقول اسمه المفروض يقول الأسطورة عادل إمام، حتى وهو قاعد في بيته تاعبهم وقالقهم، فده شيء جميل، أنت عايز أحسن من كدة عظمة إيه، عادل بقاله سنتين مبيعملش حاجة وهو قاعد في البيت مضايقهم.

وتابعت غادة عبد الرازق، كاشفةً تفاصيل فيلمها الجديد: فيلمي الجديد اسمه البقاء للأصيع، ده فيلم كوميدي معايا أحمد آدم وبيومي فؤاد ومحمود حافظ، هو تركيبة دمها خفيف وأنا بقالي كتير معملتش كوميدي فـ اتبسطت جدا بالتجربة، وكنت سعيدة جدا لأن المخرج شريف إسماعيل إنسان جميل، وأنا مستنياه ينزل عشان أنا كغادة أتفرج عليه.

كما علقت غادة عبد الرازق على الهجوم الذي حدث على فيلم الفنان محمد هنيدي الأخير مرعي البريمو، وقالت: دي بتبقى حسابات خاصة وناس بتخلص حسابات مع ناس، لكن حكاية إن العمل يجلي، أعظم نجوم جابتها مصر من الخمسينات والأربعينات عملوا أفلام كويسة جدا وعملوا أفلام تانية لو شفتها هتقول هما إزاي عملوا ده وقبلوه ليه، وأيامها مكنش ينفع تقول دول بيشتغلوا عشان الفلوس، لا دول كانوا نجوم أكتر من صف أول كمان.

وتابعت غادة عبد الرازق: حتى أنا، كلنا بلا استثناء حصلنا ده واللي أعظم من غادة عبد الرازق بكتير وأسماء كبيرة عملوا أعمال مهمة جدا، ولكن تلاقيهم عاملين أعمال تانية متصدقش إنهم عملوها. 

غادة عبد الرازق: أنا مش مغنية وبتنفس تمثيل

وعن احتمالية اتجاه غادة عبد الرازق لمجال الغناء بجانب التمثيل، قالت: لا مقدرش أعمل كدة طبعا بس لو بعمل فيلم استعراضي واتطلب إني أغني جواه، اه ممكن، مسرح مثلا، ممكن برضه، لكن في المطلق لأ، لأنها مش مهنتي أنا مش مطربة، ولا حتى مؤدية، أنا مهنتي التمثيل وده حياتي وبتنفسه، والموهبة اللي ربنا ادهالي.

واختتمت غادة عبد الرازق حديثها، قائلةً: أنا بعشق الأردن وشعبها، لأن روتانا بنتي درست هناك 3 سنين طيران، وكنت بروحلها فعندنا صحاب كتير من هناك وعيشنا في البلد 3 سنين.