الفنان أكرم حسني
كشف الفنان أكرم حسني، كواليس محادثته مع اللاعب محمد صلاح بخصوص مسلسلاته، موضحًا أن صلاح حريصًا على مشاهدة الأعمال الرمضانية.
وقال أكرم حسني، في لقائه مع الإعلامي معتز الدمرداش، في برنامجه ضيفي: محمد صلاح حريص في كل رمضان إنه يختار مسلسلين يتفرج عليهم وأعتقد بيبقى فيهم واحد كوميدي، ولاقيته باعتلي على إنستجرام بيقولي أقسم بالله أنت عالمي على مسلسل مكتوب عليا، قولتله لما أنا عالمي أنت تبقى إيه.
أكرم حسني: محمد منير من أكبر الداعمين لي وتجمعنا صداقة منذ 2013
كما تحدث عن تفاصيل تعاونه مع الكينج محمد منير أغنية للي، قائلًا: الكينج هو صديق شخصي من 2013 وكان مشجع جدًا ليا من وأنا بقدم أبو حفيظة، وفي مرة طلب مني أكتب له أغنية وحاولت أشتغل فيها ولكن متوفقتش، والموضوع شاله من دماغه، ولكن كان بيزن في دماغي لغاية ما جه وقت جاتلي فكرة للي، وبعتله قولتله فاكر الطلب بتاع زمان وأتمنى تعجبك، واتكتب في الـ CV بتاعي إني اشتغلت مع واحد من عمالقة الفن المصري اسمه محمد منير.
أما عن تفاصيل اكتشافه موهبة تأليف الأغاني، فعلق أكرم حسني قائلًا: أنا فخور بكل حاجة عملتها بشكل منفرد، وأنا بحب الموهبة اللي ربنا مديهاني وبحب أوظفها بحيث الناس تتبسط وأنا اتبسط، ومببخلش على نفسي ولا على حد فكرة أن لو في حاجاة أقدر أقدمها إني مش هعملها علشان ميتقالش ده بيعمل كل حاجة.
وأضاف: في وقت من الأوقات مكنتش مكتشف إني بعرف أكتب كلمات أغاني كويس، أنا كنت بعمل ده في نطاق العائلة والأصدقاء، لغاية ما اكتشفت أن هذه الملكة موجودة طيب ليه موظفهاش؟ فبدأت وتطورت من الأغاني الكوميدي الساخر في أبو حفيظة، الأول كنت بعمل محاكاة لأغاني كنت باخد حقوق استغلال ألحان وأكتب عليها كلام، بعد كده بقيت بكتب الكلام من أوله لآخره وبلحنه أو بجيب ملحن، أقصد أن صناعة كتابة الأغاني تطورت عندي.
أما عن نجاح فيلمه العميل صفر، فعلق أكرم حسني قائلًا: بحمد ربنا إن ربنا مبيضيعش التعب، العميل صفر من الحاجات اللي قعدنا فترة كبيرة نحضر لها، وفي الأخر ربنا بيكلل كل ده أن الجمهور بيقول الفيلم حلو وشباك التذاكر بيقول كلام كويس، الحمد لله شعور الرضا والانبساط والتقدير لعدل وعظمة ربنا.
وأضاف: أنا بعيش لحظات استثنائية، وكل زملائي الفنانيين أساتذة كبار وعملوا مجهود كبير وأعمال حلوة جدا وفكرة المنافسة مين إيراداته أكبر من مين والله عمرها ما شغلتني، كل اللي بيشغلني إني أعمل فيلم حلو، واعتقد أن زملائي بيعملوا كده وده في الآخر بيصب في مصلحة الجمهور.
كما كشف أكرم حسني سر اسم شخصيته في فيلم العميل صفر، قائلا: اسم شخصية صفر في فيلم العميل صفر له مبرر في الدراما، لأن الشخصية كان اسمها صقر وفي السجل المدني نسيوا النقطة وبقى اسمه صفر، وده انعكس على شخصيته في الفيلم، يعني هو مش مجرد اسم فيه إفيه لأ ده بيخدم في الدراما.
