الفنان خالد محمود
أعرب الفنان خالد محمود عن سعادته، بتوليه منصب المدير الفني والمشرف على فرقة مسرح الشمس، حيث أشار إلى أن الهدف من الفرقة هو دمج ذوي الهمم في المتجمع، مؤكدا أنهم قوة لا يُستهان بها في المجتمع المصري.
وقال خالد محمود في تصريحات خاصة: بعمل مبادرة لدمج ذوي الهمم في جميع قطاعات الأعمال في مصر، لأنهم يملكون قدرات خاصة تفوق قدرات الناس العادية، وعددهم 12 مليون فرد، يعني بيشكلوا 15% من عدد سكان مصر، قوة لا يُستهان بها.
وتابع خالد محمود: أسوأ شيء أننا نتركهم مهملين، لا بد من دمجهم في جميع قطاعات الأعمال، هيفيدهم ويحسسهم بذاتهم وهيكونوا مفيدين لنفسهم ولمصر، ذوي الهمم دول ملائكة الأرض، وأنا بحمد ربنا إنه وفقني للعمل في مسرح الشمس، علشان أكون في خدمتهم، ربنا يقدرني على خدمتهم.
وفي سياق آخر، سبق وتحدث خالد محمود عن رأيه في حرمانية الفن، حيث قال إن الرسول صل الله عليه وسلم حسم كل شيء، عندما قال “الحلال بيّن والحرام بّين”، متابعًا: كل حاجة فيها حلال وحرام، يعني الموظف اللي بيتعبنا ويلوي دراعنا ويفتح الدرج، واللي قاعد في كشك وبيسرقنا في الأسعار كل ده حرام.. كل المهن فيها حلال وحرام.
وأكد خالد محمود أن الفن سلاح ذو حدين، موضحًا: اللي إحنا عاوزينه هو اللي هيكون، أنا بقدم فن حلال، وقبل كدة قابلني شباب بطلوا الإدمان، بسبب دور عملته، أنا وقتها عرفت إن الرسالة وصلت، دا العمل اللي بيوصل للناس بصدق.
خالد محمود: رفضت أدوار القبلات ومتمسك بالسينما النظيفة
وأكد الفنان خالد محمود أنه رفض العديد من الأدوار الفنية بسبب المشاهد التي كانت تحمل قُبلات وأشياء لا تتناسب مع الذوق العام للجمهور، موضحًا: قبل كدا اختلفت مع مخرج وقولتله مش هعمل الدور ده عشان مش هنوصل الرسالة بالقبلة، لا دا المعنى ولا دا الهدف من الفن.
وأكمل خالد محمود: الفن رسالة مش بقلة الأدب ولا البلطجة ولا القبلات، ومش هي دي رسالة الفن، رسالة الفن أننا بنوصل بالقيمة والأخلاق والأدب والرقي للمشاهدين، والمبادئ لا تتجزأ، يعني اللي شغال مهندس مش هيبيع نفسه في مكان ويبقى محترم في مكان تاني، لذلك أنا متمسك بمصطلح السينما النظيفة ومش هعمل حاجة مخلة.
