جهاد حسام الدين عن تجسيدها والدة سفاح الجيزة: الأدوار النسائية الأكشن قليلة.. ودوّرتلها على دوافع لقتل جوزها

الفنانة جهاد حسام الدين

كشفت الفنانة جهاد حسام الدين، والتي قامت بدور والدة سفاح الجيزة -هانم- ضمن أحداث المسلسل في مشاهد الفلاش باك، كواليس مشاركتها في العمل، التي أعربت عن سعادتها البالغة بها، بالإضافة إلى تحضيراتها للشخصية ولمشهد القتل.

وقالت جهاد حسام الدين في تصريحات خاصة: أنا شايفة إني محظوظة إني عملت الدور ده، لأن قليل لما بيكون في أدوار نسائية فيها النوع ده من الأكشن، والدور جالي من خلال الطريقة التقليدية، وهو عن طريق مكتب الكاستينج الخاص بالمسلسل، وروحت عملت تجربة أداء لمشهد القتل، والمخرج هادي الباجوري اخترني.

وتابعت جهاد حسام الدين، موضحة كيفية تحضيرها لشخصية والدة السفاح في سنها الصغير، وقالت: التحضير للشخصية كان في جزء منه أنا لوحدي وجزء مع باقي كاست العمل، الجزء اللي لوحدي اشتغلت على القصة بتاعة الست وهي ليه حصلها كدة وإيه دوافعها لـ اللي عملته، هي معملتش ده لأنها شريرة بس، هي عملت ده دفاعًا عن نفسها وعن بيتها من جوزها اللي كان عايز ياخد بيتها وهي وعيالها كانوا هيبقى في الشارع.

جهاد حسام الدين: لازم كممثلة أدور على دوافع الشخصية للقتل

وأردفت حسام الدين: فاللي عملته ده كان طريقة بتحاول تنجو بيها، وكممثلة كان لازم أدور على الدوافع اللي تخليها تعمل ده، والشخصية الحقيقة كانت شايفة إنه على جثتي أو على جثتك إنك تاخد البيت ده، فكل التحضير كان داخلي، ويوم التصوير كان تحضير جسدي، يعني كان لازم أكون مسخنة جسمي للي هواجهه؛ لأن بيكون في تعليمات بتتوجهلي في لحظتها.

جهاد حسام الدين

أبدى المخرج محمد دياب، رأيه في مسلسل سفاح الجيزة، بطولة الفنان أحمد فهمي الذي يعرض حاليًا عبر منصة شاهد.

وكتب محمد دياب على فيس بوك: اتفرجت على مسلسل سفاح الجيزة.. شخصيًا كنت رافض فكرة القاتل المتسلسل وبحس إنها غربية ولو اتعملت هنا هتبقى كأنها مترجمة وبعيدة عن واقعنا بس المسلسل حقيقي ومصري جدًا ومكتوب حلو جدًا وفيه شغل هايل في تبادل الأزمنة واختيار امتى يديك معلومة وامتى يخبي عليك.

وتابع دياب: أما الإخراج فبصراحة مستوى سينمائي وشغل على كل العناصر عشان تطلع بالتميز ده زي الملابس والديكور والموسيقى واختيار الأغاني الرائع.. وأخيرًا تحية لأحمد فهمي لإصراره على تغيير جلده وإثبات إنه ممثل بجد مبروك جدًا ومستني باقي الحلقات.

مسلسل سفاح الجيزة  

من جانبه، ظهرت جهاد حسام الدين، في عدة مشاهد في الحلقتين الثالثة والرابعة من مسلسل سفاح الجيزة، مجسدةً شخصية والدة الصفاح في مشاهد الفلاش باك وهي صغيرة في السن، وتلعب الشخصية في السن الكبير، الفنانة حنان يوسف، وقامت مشاهد جهاد بكشف بعض الجوانب من علاقة السفاح -أحمد فهمي- بوالدته، عندما قامت بقتل والده في أحد المشاهد، وكان هو مراقبًا لما حدث وهو في سنه الصغير.