حورية فرغلي توجه نصيحة للفتيات بعد استئصالها للرحم: الجمال مش كل حاجة لكن اللي بيعيش الجواز والأمومة

الفنانة حورية فرغلي

كشفت الفنانة حورية فرغلي تطورات وضعها الصحي بعد خضوعها مؤخرًا لعملية استئصال الرحم، بعد اكتشافها وجود 9 أورام خبيثة بالرحم، الأمر الذي اضطرها لاستئصاله حتى لا يتفاقم الأمر.

وقالت حورية فرغلي في لقاء مع ET بالعربي: حاسة بنفسي أحسن بكتير وعندي طاقة ومش تعبانة وباكل كويس لإن الورم اللي على الرحم كان مأثر عليا، ودي مش أول مرة أخضع لعملية، عملت عملية شبه دي وأنا عندي 30 سنة وكان عندي 7 أورام والدكتور قال لي قدامك 10 سنين وبالمساعدة تقدري تحملي ولما تخلفي وأنا بولدك هشيل لك الرحم، وما أتجوزتش خلال المدة دي.

مش عارفة إيه ممكن يعوضني إحساس الأمومة 

وتحدثت حورية فرغلي عن حلم الأمومة ومشهدها في مسلسل حكايات بنات، وهي تمسك بابنة صديقتها عقب ولادتها مباشرة، قائلة: عمري ما مسكت بيبي ولما مسكتها حسيت وكإني بتكلم مع بنتي، وفي آخر الكلام قلت لها هسميكي حورية، وكنت بتكلم من قلبي، وكان نفسي أجيب بنت وده حلمي طول عمري، ومش عارفة إيه ممكن يعوض الإحساس ده، خاصة إن الحاجة الوحيدة اللي كانت ممكن تفرحني هي إني أجيب بيبي.

وكشف حورية فرغلي أن الفنانات اللاتي تسألن عليها باستمرار هن، الفنانة نبيلة عبيد وصفية العمري وميرفت أمين، قائلة: ميعروفونيش ومشفونيش قبل كده، ولكن بيكلموني كل يوم لإنهم حسوا بالمأساة دي. 

حورية فرغلي توجه نصيحة للفتيات 

كما وجهت حورية فرغلي نصيحة للفتيات قائلة: الجمال مش كل حاجة، لو أنتي جميلة الناس هتقول واو زي القمر، ولكن لما ياخدوا عليكي هيشوفوكي عادية جدا، واللي بيعيش فعلا هو إنك تتجوزي ويكون عندك ولاد، ودي الحاجة اللي ندمانة عليها، ولو رجع بيا الزمن هتجوز للإن هو ده اللي كان هيعيش لي، أصل مين هياخد باله مني وهيحبني بشكلي ده غير جوزي اللي مش عارفة هو فين دلوقتي وإن شاء الله يظهر.

رد مطرب المهرجانات حسن شاكوش، على شائعات وجود علاقة تجمعه بالفنانة حورية فرغلي خلال فترة زواجه من ريم طارق، بعد تصريحات طليقته في لقاء تلفزيوني قبل يومين حول وجود علاقة بين طليقها بإحدى الفنانات الحرف الثالث من اسمها راء، الأمر الذي جعل البعض يزعم أنها الفنانة حورية فرغلي.

وأكد حسن شاكوش أنه لا يوجد علاقة تجمعه بحورية فرغلي ولا يعرف سبب خروج تلك الشائعات، مشيرًا إلى أن حورية صديقة وزميلة ولكن لا يوجد أي علاقة تجمعهما.

وكتب حسن شاكوش عبر صفحته الرسمية بموقع فيس بوك قائلا: جمهوري الغالي كل معاني الشكر ليكم ولكل شخص متفهم الموقف وشاركني البوست أنا شفت معظم التعليقات ومحترم كل شخص وكل كلمة حتى لو هيا عكسية الحقيقة دائما عند ربنا وسكوتي وعدم ردي شئ مريحني أكتر من الكلام ولكن في شئ يخص فنانة جميلة كلنا بنحبها وبنحترمها وحقيقي أنا لا أعلم صحة الكلام اللي بيتقال ولكن أنا من خلال صفحاتي الرسمية بحب أقول إن الفنانة حورية فرغلي لا يمسني بيها أي شيء غير أنها زميلة وصديقة عمل.

وأضاف حسن شاكوش: ومش فاهم سبب وجود سيرتها في الموضوع إيه من خلال البرامج أنا دلوقتي كلامي للإعلام أرجوكم بلاش تشاركوا الناس كلام غلط كفاية كلام في تفاصيل وحياة شخصية اللي ظاهر للناس يخص الناس أنا دلوقتي بمتنع عن أي كلام في حاجة تخص حياتي الشخصية أرجوا احترام رغبتي وكل التقدير ليكي يا فنانة يا كبيرة وبعتذر ليك مرة أخرى عن أي شئ اتحطيتي فيه.

حورية فرغلي ترد على تصريحات طليقة حسن شاكوش

وسبق أن نفت حورية فرغلي، في تصريح خاص، علاقتها بـ حسن شاكوش وقالت: عمري ما شفته ولا أعرفه شخصيًا، أنا مش بصاحب أصلا فأكيد مش هعرف راجل متجوز، وأنا مش بتاعة الكلام ده آخري صداقة، ولو الموضوع انتشر بالشكل ده هرفع قضية تشهير.