بعد اتهام محمد رحيم له بسرقة ألحانه.. رامي صبري: بعتذرلك قدام الناس وده توارد أفكار

الفنان رامي صبري

رد الفنان رامي صبري على اتهامات الملحن محمد رحيم الأخيرة له حول سرقة ألحانه، بعدما هاجمه الأول وأشار إلى أنه يهاجم نجاحات الآخرين، مثلما فعل مع الملحن عمرو مصطفى بعد أغنيته بشرة خير.

وكتب رامي صبري تعليقًا، على منشور محمد رحيم، عبر حسابه بموقع التواصل الاجتماعي فيس بوك، الذي كان يتهمه فيه بسرقة ألحانه، وجاء فيه: وأنا كمان بحبك وأنت عارف، ولو كان خاني التعبير فـ أنا بعتذر لك قدام الناس إنك فهمتني غلط، وأنا مقدرش أزعلك أبدا.

وأضاف رامي صبري: موضوع الشبه في الأغاني أنت عارف إن الموسيقى في العالم 7 نغمات، وكلنا بندور حولهم، ولو مسكنا مين شبه مين هنطلع تقريبا معظم الأغاني شبه بعض، وده شيء طبيعي وبيحصل.. توارد الأفكار، مرة تانية رحيم ملحن وفنان كبير جدًا، أحترمه وأقدره، وزعلك فوق راسي.

رد محمد رحيم على اتهامات رامي صبري بمهاجمته لنجاح الآخرين

وفي وقت سابق، علق محمد رحيم على اتهامات رامي صبري له بمهاجمته لنجاحات الآخرين، منهم عمرو مصطفى، ومهاجمته له بعد نجاح أغنيته بشرة خير في عام 2013، وكتب رحيم منشورًا عبر حسابه بموقع فيس بوك، وجاء فيه: ردي على صديقي الفنان الكبير رامي صبري بعد اتهامه لي في وسائل الاعلام إني بهاجم النجاح، أولًا يعلم الله سبحانه وتعالى إني معنديش أدنى وقت أضيعه في إني أدخل في أي مواضيع نظرًا لانشغالي بمجموعة أعمال مهمة جدًا إن شاء الله الناس هتشوفها قريب.

وأضاف محمد رحيم، متهمًا رامي صبري بسرقة ألحانه، قائلًا: كما تم إرفاق لحنين آخرين من أعمالي وهما أنا بحب عيونك للفنان عمرو دياب، وأغنية مشاعر للفنانة شيرين عبد الوهاب، واللي حصل إني لقيت نفس اللحنين دول تم استعمالهم في أغاني خاصة بيك وحققوا نجاح كبير معاك من غير ما تضع اسمي عليهم على الأقل جنب اسمك.

محمد رحيم: لحن أغنية بشرة خيرة مطابق لـ لحن عملين من أعمالي 

واستكمل: أولًا أنا الحمد لله مش ناقص نجاح وتاريخ بفضل الله سبحانه وتعالى علشان أهاجم أي حد ناجح، ربنا يعلم إني بدعي في صلاتي بالرزق والتوفيق لكل الناس وبتمنى الخير للجميع، اللي حصل ساعتها إني علقت إن لحن بشرة خير شبيه إلى حد التطابق لـ عملين من أعمالي وهما أغنية لا كده عاجبين للمطربة الصاعدة إيمان سمير، وأغنية كل ده يطلع منك للنجمة شيرين وجدي، والأغنيتين صدروا سنة (2004) يعني قبل صدور لحن بشرة خير بـ9 سنين على الأقل.

وتابع محمد رحيم: نظرًا لنجاح بشرة خير وفرحتنا كلنا بيها، أنا قفلت الموضوع تمامًا ومرضيتش أبين للناس أنا بقول كده ليه، ولكن الفيديو اللي تحت ده هو الفيصل اللي هيبين للناس إذا كنت بخترع كلام من دماغي ولا كلامي فعلًا صح بناء على علم ودراسة وخبرة، وأنت طبعًا راجل فاهم ودارس مزيكا برضه زينا.

محمد رحيم: رامي صبري استخدم ألحاني في أغانيه

وأوضح: كما تم إرفاق لحنين آخرين من أعمالي وهما أنا بحب عيونك للفنان عمرو دياب، وأغنية مشاعر للفنانة شيرين عبد الوهاب، واللي حصل إني لقيت نفس اللحنين دول تم استعمالهم في أغاني خاصة بيك وحققوا نجاح كبير معاك من غير ما تضع اسمي عليهم على الأقل جنب اسمك، وطبعًا الفيديو هيوضح المسألة دي جدًا حتى لغير المتخصصين وواثق أن الجمهور هيتفاجئ وفي ناس كتير هتستغرب أنا إزاي سكت طول السنين دي، والإجابة لأني إنسان مسالم ومحترم وعمري ما أسمح لنفسي أرفع قضية على زميل وأخ ومؤمن بتوارد الخواطر وحسن النية دائمًا، وطبعا دي مش دعوة للتخلي عن الحقوق ولكن العشرة الطيبة والمحبة والصداقة ليها علينا حق.

وأضاف محمد رحيم: الخلاصة أنك هاجمتني قبل كده أكتر من مرة وما زلت لأني قلت كلمتين (فضفضة) هما من صميم حقي وقوانين الملكية الفكرية واضحة ومفيهاش هزار في بلدنا وفي كل دول العالم، وكنت بشوف مجهودي وتعبي بينسب لغيري وبستحمل وبسكت عشرات المرات وللأسف أنت اللي زعلان وبتتهمني إني كنت بهاجم النجاح، لأ أنا قطعًا مش بهاجم النجاح لأنني والحمد لله صديق النجاح، أنا فقط كنت بعلق على استحياء وخجل على ظاهرة سلبية جدًا ومتكررة في أسلوب العمل في الوسط الفني، وهي ظاهرة استغلال واستحلال مجهود الناس بدون وجه حق ونسبته لغير أصحابه الحقيقيين.

وتابع: أنا عايز بعد تجربتك الأخيرة مع عمرو اللي سببت المشكلي دي كلها، الناس تحاول تتخيل أنا ساكت على إيه بقالي سنين، ولكن بعد الاعتداء على أعمالى وأفكاري ومجهودي ثم سكوتي وصمتي أطلع بحارب النجاح كمان وكمان أطلع مش عاجب؟ لأ طبعًا ده كلام مرفوض تمامًا وفعلًا أنا مش هسمح لأي حد يقوله وربنا يسامح الجميع، وطبعًا أنا برد على الملأ لأنه كلامك كان على الملأ، فلذا وجب التصحيح والتوضيح، مع تأكيدي أن عمرو مصطفى طبعًا أنا بعشقه وبحبه من قلبي، وأنت كمان أخويا وبحبك.

 واختتم محمد رحيم، قائلًا: الدليل إني أول مرة أتكلم على مواضيع زي دي حدثت منذ سنوات، ولكن زي ما أنت عندك أسرة وعندك جمهور تخاف على شكلك قدامهم، أنا كمان زيك بالظبط، مع تمنياتي بالتوفيق والنجاح الكبير للجميع، أخوك الموسيقار المصري العالمي المجتهد والمحترم والمحب محمد رحيم.

أزمة عمرو مصطفى ورامي صبري

سبق، واتهم عمرو مصطفى رامي صبري بسرقة لحن أغنية رقصة، واستخدامه في أغنيته الشهيرة يمكن خير، كما تم حذف أغنية يمكن خير من موقع يوتيوب، ولكن انتهى الخلاف بالصلح بين الطرفين.