الفنان عمرو مصطفى
حذف الفنان عمرو مصطفى أغنية يمكن خير للمطرب رامي صبري، عبر موقع الفيديوهات العالمي يوتيوب، بعد نشوب عدة خلافات بينهما حول لحن الأغنية.
عمرو مصطفى يتهم رامي صبري بالسرقة
وكان قد اتهم الفنان عمرو مصطفى الفنان رامي صبري بسرقة لحن أغنيته رقصة، وذلك خلال استضافته في برنامج حبر سري وقال: أنا سبت أغنية يمكن خير لرامي صبري بمزاجي ولو عايز أشيله الأغنية من اليوتيوب هشيلها وهي نجحت عشان هي بتاعتي.
وأضاف: هو كلمني وقالي معلش عشان خاطري شكلي مش حلو وقالي أي كلام في أي حاجة وأنا عديتها بمزاجي وهي أغنيتي وأنا سبتهاله بمزاجي ولو هو كان زود كنت هوقفه وبتاعتي نازله على اليوتيوب من سنين.
ووجه حديثه لرامي صبري قائلًا: انت سرقت لحن أغنيتي رقصة وعملت بيها أغنية يمكن خير وعايزك تثبت أن أنت عاملها من 2009 زي ما قولت.
كلمات أغنية يمكن خير
وجاءت أغنية يمكن خير من كلمات أحمد علي موسى، ألحان رامي صبري، وتوزيع ومكس وماستر طارق توكل، وتقول كلماتها: “ولا وقته اننا نتحاسب ولا وقته إني ألوم ولا اعاتب إيه إيه هيفيد على اد ماقلبي وجعني وانا شايفك جاي تودعني و ماشي ماشي بعيد يمكن خير ومين يندم على اللي يبيع سنين ويهد أحلامه في يومين ويبيع اوام هنساك”.
“واعيش واهو حب راح وخلاص مفيش لهواك مكان ميهمنيش خلص الكلام ولا وقته اننا نتحاسب….. يمكن خير عشان كان لازم ابعد من زمان انا وانت ميسعناش مكان والبركة فيك موضوعنا مات مبقاش خلاص في معجزات وبلاش نقلب في اللي فات راح عليه…. ولا وقته اننا نتحاسب”.
قال الفنان رامي صبري، إنه يعتبر موسيقارا مثل عمر خيرت وياسر عبد الرحمن، حيث إنه درس الموسيقى في المعهد العالي للموسيقى العربية، وعلق على اتهامات الفنان عمرو مصطفى له بشأن اقتباسه لحن أغنية يمكن خير من أغنية رقصة.
وأوضح رامي صبري خلال تصريحات إذاعية: معنديش مشكلة تقول صوتي وحش أو الأغاني بتاعتي وحشة أو مش نجم ومش ناجح إنما تطلع تقول أنت سرقت دي كلمة كبيرة، رامي صبري مش مطرب بس، أنا راجل دارس موسيقى ومتخرج من المعهد العالي للموسيقى العربية قسم تأليف موسيقى كلمة كبيرة جدًا زي عمر خيرت وياسر عبد الرحمن موسيقار المفروض أنا مبتكلمش عن نفسي كتير، وهو خريج جامعة القاهرة كلية حقوق في الآخر أنا متخصص، فلما ييجي يتكلم الأستاذ مع الطالب معاه مش هنتساوى، الدراسة بتخلي عندك ثقة في الكلام عن الموسيقى، وهو بيتكلم غلط.
وأضاف رامي: لو هو يعرفني كويس هيبقى عارف إني فنان والمبدع الحقيقي مش بيسرق، فيه فرق بين السرقة وتوارد الأفكار، زمان عملت أغنية للفنان عامر منيب اسمها مكنش حب وهندم ليه، بعدها بسنة عمل عمرو دياب أغنية أي حاجة تيجي من ريحة الحبايب، السرقة اللي بجد بتكون في اقتباس 4 موازير، لكن اللي حصل إنه فيه تشابه في 3 بس، وده توارد أفكار.
