الفنان أحمد ماهر
كشف الفنان أحمد ماهر تفاصيل رؤياه للرسول صلى الله عليه وسلم في منامه، مؤكدًا أنها إحساس رائع ومختلف وتمنى إخبار العالم بها.
وقال الفنان أحمد ماهر باكيًا، خلال تصريحات خاصة: إحساس جميل، عايز أقول للعالم إني شوفته، وأمي رحمة الله عليها قالتلي متقولش لحد وإلا الرؤية هتفسد ومش هتشوفه، ولو كتمت هذا السر هتزوره والسنة دي وحصل بالفعل.
وتابع الفنان أحمد ماهر: أنا حلمت الحلم ده، وأنا كنت هموت وأحكي، وبطلع المقطم وأنا فرحان وسعيد وناجح، أو وأنا حزين وعايز أكلم بير أسراري، وبقعد أتكلم، وبحس إني بكلم جبل المقطم، ف طلعت قولت يا مقطم أنا شوفت حضرة النبي عليه أفضل الصلاة والسلام في الحلم ونزلت مع آذان الفجر.
واستكمل الفنان أحمد ماهر: لقيت اللي مستنيني على الباب بيقولي هات باسبورك لأنك مطلوب في مسلسل بأبو ظبي، قولتله مين اللي رشحني قالي الحاج رشوان توفيق، أول ما وصلت قالي بشكرك، قالي متشكرنيش باركلي السعودية رافضة دخول المصريين علشان السادات مضى كامب ديفيد، ووقعت في عرض القنصل وأداني التأشيرة وهعمل عمرة، قولتله خصيمك النبي أنا معاك، وروحت معاه العمرة، وكل الوسط الفني حضر الواقعة.
تفاصيل رؤية أحمد ماهر لـ الرسول
وعن تفاصيل الحلم، قال الفنان أحمد ماهر: حلمت أن السماء سجدت ونزلت فوق سطح بيتنا، وأنا عمال أخطي وأدوس على النجوم وشوفت في آخر السطوح شخصية بتطلع نور، قلبي كلمني وقتها وقالي ده سيدنا النبي عليه الصلاة والسلام، وإحنا في الحي عندنا ناس عينها مش كويسة وبتحسد ومعروفة، فأنا من خوفي على حضرة النبي عليه الصلاة والسلام جريت على السور أخلع قوالب الطوب واللي يطلع أحدفه بيها عشان مفيش حد يبص على سيدنا النبي.
كما علق أحمد ماهر على تدخل الجمهور في علاقة الفنان بـ ربه، قائلا: كل واحد حر وعلاقة العبد بـ ربه، علاقة شخصية، ومينفعش حد يتدخل في العلاقة دي، وأنا اتُهمت بأني شيعي لأني بحب الحسين وبزوره، وحتى أنا لو كافر أنا حر، لأن ربنا قال من شاء فليؤمن ومن شاء فليكفر، والإنسان له مطلق الحرية في الدين؛ لأن ربنا اللي بيحاسب مش الناس
