المطربة الشابة كارمن سليمان
أعربت المطربة الشابة كارمن سليمان عن سعادتها بمسيرتها الفنية من بدايتها وحتى الآن، وذلك من خلال لقائها اليوم ببرنامج أجمد 7 الساعة 7 مع المذيعة جيهان عبد الله، عبر محطة راديو نجوم إف إم.
وقالت كارمن سليمان: أنا مبسوطة باللي وصلت ليه وكان نفسي بالتأكيد يكون أفضل، ولكن اللي عطلني كانت ظروف إنتاجية وهي اللي عقدت بعض الأمور، والحمد لله فخورة بمسيرتي لغاية دلوقتي، وسعيدة أني عملته خطوة خطوة، وكان نفسي يكون عندي أغاني أكتر طبعا، وأكون متواجدة بشكل مكثف على الساحة.
كارمن سليمان والمنافسة
وفي الحلقة ذاتها، أوضحت كارمن سليمان رأيها في المنافسة بينها وبين باقي زميلاتها المطربات، فقالت: كل واحد بيشتغل على موهبته وطريقته ومش كلنا زي بعض أو نفس الاستايل، ومش بحس أنها منافسة على قد سعادتي بوجود الفنانات والمطربات كتير على الساحة، والحمد لله الناس عارفاني في الوطن العربي بشكل قوي.
وأضافت: وأنا بدأت مسيرتي وعندي 16 سنة وأكيد هي فترة تجربة وكنت صغيرة، والحمد لله لقيت نفسي في مكان كويس، ومينفعش أهمل كل دا ولكن لازم أركز في شغلي بشكل أقوى، بجانب أني بعمل كل اللي نفسي فيه في حياتي الشخصية.. وممكن أغني تراب، لكن مش هيليق عليا غناء مهرجانات لأنه مش ذوقي ومش بحس نفسي فيه.
إيهاب صالح مدير أعمال كارمن سليمان
وسبق وأن أعلن إيهاب صالح، مدير أعمال الفنانة شيرين عبد الوهاب السابق عن توليه منصب إدارة أعمال الفنانة كارمن سليمان، وذلك بعد ساعات قليلة من اعتذاره عن العمل مع شيرين عبد الوهاب.
وكتب إيهاب صالح عبر حسابه الرسمي بموقع التدوينات القصيرة “تويتر”: “سعيد و بتشرف جدا انى أعلن إن من النهاردة مسكت رسميا إدارة اعمال النجمة كارمن سليمان. كارمن حد موهوب فوق الطبيعي، شخصية في منتهي الجمال و الرقي و من وجهة نظري هي المستقبل عشان عندها كل الامكانيات و هي عارفة إني فان كبير ليها من قبل مشتغل معاها فعلا. كارمن إن شاء الله الميجاستار القادمة من مصر للكل الفترة الجاية و افتكروا كلامي ده كويس.”.
