حسن يوسف يفجر مفاجأة: سعاد حسني اترمت منتحرتش.. وممكن يكونوا أدولها حقنة توقف قلبها

سعاد حسني

تحدث الفنان القدير حسن يوسف عن رأيه قضية مقتل السندريلا سعاد حسني، حيث رجح أن الفنانة الراحلة قتلت ولم تنتحر مثلما زعم البعض، مشيرا إلى أن قتلة السندريلا ربما يكونوا أعطوها حقنة لتوقف قلبها، قبل أن يلقوا الجثة من المسكن التي كانت تقيم به، حسب قوله.

وقال حسن يوسف خلال ندوة تكريمه في قصر السينما: أعتقد إن سعاد حسني اتقتلت مش انتحرت، والمنتحر المفروض يكون جمبه دم، هي اتقتلت في الشقة قبل ما تترمي أدوها حقنة توقف قلبها مثلا.

واستكمل حسن يوسف: روحنا لندن نزور ابننا محمود ومن أهداف الرحلة إن شمس، تقنعها بالرجوع وكانت بدأت تخس وينزل وزنها، وكان عندها العصب السابع، وبعدين سمعنا إنها اترمت، كانت بتستعد إنها تيجي وترجع.. الله يرحمها زعلت عليها أوي وكنت بعتبرها زميلة تختة الله يرحمها كانت موهبة كبيرة أوي.

حسن يوسف يكشف مفاجأة عن وفاة سعاد حسني 

وتابع حسن يوسف: سعاد حسني كانت تيجي التصوير معاها ملوخية وهلهلية، ودمها زي الشربات، كانت عبقرية بشهادة فاتن حمامة اللي قالت: السينما قدامها كتير عشان تجيب زي سعاد حسني في براعتها وحضورها.

وأضاف حسن يوسف: لحظات السعادة كانت قدام الكاميرا، ولكن كانت في حياتها تعيسة وكل زيجاتها كانت فاشلة وأنا كنت زي أخوها، وتكلمني الساعة 2 بليل تقولي إلحقني صلاح كريم هيموتني.. وأنا أنزلها وأقولها خليكي زيي شوفي نادية لطفي بتعمل ايه بتحسبها بالمللي.. الله يرحمها كانت ممثلة متتعوضش رغم إن فيه بنات كتير طلعوا بعدها.

كشف الفنان حسن يوسف، أنه هو من تعاقد لزوجته الفنانة شمس البارودي للمشاركة في بطولة فيلم اتنين على الطريق، والذي تعاونت خلاله مع الفنان عادل إمام عام 1984، والذي يعتبر آخر ظهور سينمائي لها، بجانب حديثه عن الفيلم الوثائقي عن حياتهما الشخصية.

وقال حسن يوسف خلال ندوة تكريمه في قصر السينما، إن زوجته الفنانة شمس البارودي كانت رافضة التعاون مع الفنان عادل إمام في فيلم اتنين على الطريق، موضحًا: شمس كانت معترضة تمثل قدام عادل إمام، وقولتلها أنا تعاقدت ليكي، ولكن الفيلم منجحش أوي رغم إننا سافرنا اليونان.

أما عن تفاصيل الفيلم الوثائقي فأكد الفنان عمر حسن يوسف، أنه يستعد لتنفيذ عمل وثائقي جديد عن قصة حياة والده الفنان حسن يوسف، ووالدته شمس البارودي، فعلق حسن يوسف قائلًا: مامته قالتله أنا مش هخرج من البيت وعايز تصور يبقى في البيت، وهو عايز يتكلم عن علاقتنا وعن مامته كأم وحبها للمطبخ وحبها لأولادها.

وتابع حسن يوسف: شمس لما اعتزلت كانت أعلى أجر وكانت بتاخد 20 ألف في الوقت اللي الناس بتاخد فيه 4 آلاف.. وابني عمر بيكتب فيلم وثائقي عننا وهو لغاية دلوقتي كسلان في الكتابة.

حسن يوسف: شمس البارودي نسيت إنها ممثلة

كما علق الفنان حسن يوسف على إمكانية عودة زوجته الفنانة شمس البارودي للفن مرة أخرى، قائلًا: شمس البارودي نسيت أساسًا إنها ممثلة وهي من سنة 1981 بعيدة وحياتها وحبها لبيتها وأولادها وجوزها أهم من أي حاجة.. وهي بتحب المطبخ أوي كمان وبتحب المطبخ أكتر مني.