الفنان أحمد فهمي
قال الفنان أحمد فهمي إن الرجل يفضل التعامل مع المرأة الذكية ويستمد قوته منها طول الوقت، بحسب تعبيره.
وأوضح أحمد فهمي خلال حلوله ضيفا ببرنامج «كلام الناس»، مع المذيعة ياسمين عز: «الراجل بيحب الست الذكية، اللى تعرف تتعامل معاه وتتلون له، وتقدر تشاركه وتكلمه عن الماتش أو عن شغله، وكل التفاصيل دي».
أضاف: «وزي ما الست ممكن تستذكى الراجل ممكن يستذكى هو كمان مش صعب ده، لكن بشوف دايما إن قوة الراجل بياخدها من الست اللي معاه، وأنا خرجت من عيلة كلها ستات، عندي 5 إخوات بنات، وشايف وفاهم الست بتفكر إزاي من وأنا صغير».
أحمد فهمي لـ ياسمين عز: انتي ذكية جدًا
وتابع موجهًا حديثه لياسمين عز: أنا بشوفك ذكية جدا، وأنك دخلتي ساحة فيها مذيعين كتير وموضوعات كتير أوي ده ذكاء”، لترد الأخيرة: “لأ دي بركة الفرعون”.
أخر اعمال الفنان أحمد فهمى
وكانت أخر اعمال الفنان أحمد فهمي، مسلسل «بين السطور»، بطولته مع الفنانة صبا مبارك، وعدد أخر من نجوم الفن ومهم: محمد علاء جاميكا، ناردين فرج، صبري فواز، وعدد آخر من الفنانين، وهو من تأليف مريم نعوم ونجلاء الحديني، وإخراج وائل فرج، وتدور أحداث العمل في إطار اجتماعي ممزوج بالإثارة ويعتمد على التشويق النفسي، ويبتعد عن الكوميديا، ومكون من 30 حلقة.
تصريحات ياسمين عز
وفي الحلقة ذاتها تحدثت الإعلامية ياسمين عزعن حفل زفاف الأمير الحسين وقالت: أخوات الأمير كانوا وافقين ورا العروسة وبيظبطوها الفستان بحب وحُسن نية، وكان سهل يجيبوا واحدة تاخد بالها من الفستان لكن صمموا يعملوا كده عشان يحسسوها أنها اختهم، والملكة رانيا بتقول أن هي رجوتنا ورجوة في عنينا في عين الحسين والرجوة اللي رجوتها من ربنا لابني، و ياريت البنات يستوعبوا درس التقدير ويتعلموا حاجة من فرح إمبارح الموضوع مش حرب، وخلي عندك ثقة في نفسك ومحبتك لأهل جوزك من محبتك ليه واعتبري مرات أخوكي أخت ليكي.
كما كشفت ياسمين عز عن حقيقة غنائها في الماضي بعد انتشار فيديو لها وهي تغني في إحدى البرامج وقالت: أنا مش بغني والإشاعة اللي طلعت عليا غلط، وأنا من 5 سنين تم دعوتي لبرنامج من تقديم الفرعون أحمد فهمي وكنا في الحلقة بنغني ونلعب ونكسب نقط وكان مطلوب اغني أغنية وغنيت اغنيتن.
