الفنانة مي عمر
كشفت الفنانة مي عمر عن رأيها في العنف ضد المرأة والسماح فيه، وذلك خلال لقاء لها في برنامج مساء دي إم سي مع الإعلامي رامي رضوان.
وقالت مي: أنا ضد أن الست تدي الراجل فرصة تانية بعد ما يضربها حتى لو كان فيه عيال، وصعب أن حد يمد أيده وميكررهاش حتى لو ندم.
مي عمر في مساء دي إم سي
كما تحدثت مي عمر في الحلقة نفسها عن الطريقة التي تتعامل بها مع بناتها بخصوص السوشيال ميديا، فقالت: مع السوشيال ميديا والانفتاح كلنا لازم ناخد بالنا من الأطفال، لأنهم بقوا سابقين سنهم بكتير، وأنا بتابع بناتي وبشوف تليفوناتهم ولو لقيت حاجة ضايقتني بقولهم ياخدوا بالهم.
وبعدها تطرقت للحديث عن طقوسها في شهر رمضان والمسلسلات التي تابعتها خلاله، فقالت: أنا محظوظة أني خلصت تصوير المسلسل يوم وقفة رمضان بليل، بس كان عندي فيلم هارلي، وخلصت هارلي يوم 18 رمضان، ولما خلصت تصوير كنت بتفرج على جعفر العمدة، وأنا بقضي رمضان في البيت ومش بخرج خالص.
وتابعت: وأنا بتفرج على جعفر العمدة مكنش نفسي أعمل شخصية فيه، وأنا ومحمد سامي متفقين، وأنا شخصية مترددة جدًا بس صعب أني أندم على قرار، بس ببقى بطيئة وعايزة حد يزقني عشان أخد القرار.
كشف المخرج محمد سامي في تصريحات لبرنامج ET بالعربي سبب عدم وجود مي عمر ضمن بطلات مسلسل جعفر العمدة الذي يتم عرضه في الموسم الدرامي الرمضاني الحالي.
وقال: “مشوفتهاش في ولا دور خالص.. مكنش عمرنا هنشتغل السنة دي خالص مع بعض واخدين بريك والحاجة التانية، وأنا بكتب مشوفتهاش في أي دور أنا مكنش عندي أي دور يمشيها خطوة لقدام كلها هي حاجات عملتها قبل كده”
وأكمل حديثه :” أنا لو أي دور رومانسي بكتبه هي أول واحدة بتخيلها فيه”.
مي عمر في علاقة مشروعة
وسبق وأن تحدثت الفنانة مي عمر عن تجسيدها لشخصية الزوجة الثانية في مسلسل علاقة مشروعة، وذلك خلال لقائها ببرنامج كلمة أخيرة مع الإعلامية لميس الحديدي.
وقالت مي عمر: شخصيتي في المسلسل حالها حال أي واحدة بتقبل في الأول أنها تكون زوجة تانية وحتى لو هي داخلة بحب وفي نيتها أنها عايزة تتجوزه في السر بس بعد فترة بتبقى مش مبسوطة بدا وعايزة تاخد حقوقها كاملة.
وتابعت: الحلو في المسلسل دا أنه مش بس عشان نقول أن الزوجة التانية وحشة، هي الزوجة التانية بتظلم نفسها، وبتضطر تقبل حاجات تخليها عايشة تعيسة، فهي بعد فترة بقيت مش قادرة تلتزم بكلمتها، وبدأت تحس أنها عايزة تاخد حقوقها كاملة، والفانز كانوا مبسوطين جدا لأن الدور مختلف مش شبه اي حاجة عملتها قبل كدا.
