حسن شاكوش بعد انتقادات إعلانه تكلفة زفافه: الـ 4 مليون جنيه مصاريف فرحي كله من بيت وعفش وشبكة

المهرجانات حسن شاكوش

رد مطرب المهرجانات حسن شاكوش، على الانتقادات التي تعرض لها بعد إعلانه عن تكلفة حفل زفافه بـ 4 ملايين جنيه، وذلك خلال استضافته في برنامج العرافة مع بسمة وهبة.

وقال حسن شاكوش في لايف عبر حسابه بموقع انستجرام: في ناس بيقولوا إزاي صارف على الفرح 4 مليون جنيه، يا جماعة أنا قصدي الفرح بالكامل من بيت وعفش وشبكة وشهر عسل.

ليه مستكترين الفرحة عليا

وأضاف: أنا بكلم أي عريس وعروسة وهما عارفين المصاريف والتكلفة وبتلاقي الدنيا فتحت عليك وأكيد ده اللي أقصده، ويا ريت اللي بيحب الخير لغيره يفرح له حتى الفرحة مستكترينها على الواحد دي بتيجي مرة في العمر.

وتابع حسن شاكوش: الواحد بيفرح للدنيا كلها قسما بالله ولا عمري فكرت آذي حد لكني اتأذيت كتير وأكتر واحد اتعرض للأذى.

وأردف: أنا حسبت مجمل تكلفة فرحي من تجهيز البيت والعفش وكل حاجة، وأي شاب بيجيب دهب، وأقل شاب بسيط لو عاوز يتجوز هيدفع شقة وعفش ودهب أقل حاجة 500 أو 600 ألف جنيه وأنا واثق من الكلام ده لأن الدنيا غليت وولعت في العالم كله، ومش بلدنا بس في ناس بتفكر بلدنا بس، وفي أفراح لوحدها بس بتتكلف ملايين غير بقى البيت.

واستكمل حسن شاكوش: أنا توضيب البيت قطم وسطي وكل المطربين اللي جم لي الفرح جم بالحب لأن ربنا عالم بحالي وباللي جويا لأني عمري ما أذيت حد ولا أتكلمت على حد ولو حد بيفهم أني تنك قسما بالله أنا ما كده أنا اللي يعرفني في الحقيقة ويعاشرني هيتصدم لأني ماشي بمبدأ ما أحكمش على حد إلا لما أعاشره.

وقال حسن شاكوش، في حواره مع الإعلامية بسمة وهبة في برنامجها العرافة، عن تصريحات حمو بيكا: حمو بيكا معاهم معاهم عليهم عليهم، ولكن على المستوى الشخصي طيب والناس بتلعب بـ دماغه، وأنا وهو مفيش أي مشاكل بينا، وعمري ما أتكلمت عليه قبل كده، وهو اللي جالي علشان يعمل معايا أغاني لأني بغني بقالي 13 سنة.

كما علق حسن شاكوش، على تصريحات المطربة شذى، في وقت سابق والتي وصفته بالمستفز، قائلًا: مين دي؟ هي دي مغنية أصلًا؟، أنتي حافظة ليها أغاني؟ وشكلها عمل كده ليه؟ ربنا يتولاها، ومش فاهم هي شايفة إني مستفز ليه دي شخصيتي، أنا عمري ما بغلط في حد ومبحبش أكون مصطنع.

حسن شاكوش: مهاجمتش اللي محضرش فرحي

وأكد حسن شاكوش، أنه لم يهاجم من لم يلبِّ دعوة حفل زفافه، قائلًا: أنا مهاجمتش اللي مجاش فرحي، أنا بحب الناس دي وكنت بتمنى يكونوا موجودين في فرحي، ممكن الناس تفهمني غلط وتفتكر إني بهدد ولكن دي طريقتي، أنا مش بحضر أقول إيه قبل ما أطلع اتكلم وبحب أكون على طبيعتي، وكان نفسي أستاذ عمرو الليثي ييجي فرحي، وعمرو أديب والدكتورة بسمة وهبة ولكن أنا عذرتك لظروفك الصحية وقلبي معاكي.