الفنان تامر حسني
كشف الفنان تامر حسني، أسباب إعادة أغانيه القديمة مرة أخرى من خلال حفلاته الغنائية، إلى جانب حديثه عن كواليس فيلم بحبك، الذي عُرض خلال الفترة الماضية في دور العرض السينمائي، بالإضافة إلى أعماله السينمائية التي يستعد لها خلال الفترة المقبلة.
وقال تامر حسني، خلال لقائه في برنامج The Insider بالعربي، إنه سعيد بردود الأفعال حول فيلم بحبك، مضيفًا: فيلم بحبك حسيت إن القصة رومانسية وأنا بفضل النوع ده من الأعمال، فحبيت أقدم كل حاجة من خلال هذا العمل سواء إخراج أو تأليف، وأظهر الحالة الموجودة داخل العمل من خلال أغاني التي عشت سنوات عليها.
تامر حسني: حققت إيرادات كبيرة في السينما المصرية
وعن نجاح فيلم بحبك، أضاف تامر حسني: الحمد الله فرحت جدًا بالإيرادات اللي حققها فيلم بحبك، في تاريخ السينما المصرية، وكان تحديا كبيرا في حياتي.
كما تطرق تامر حسني، للحديث عن أعماله المقبلة، قائلًا، إنه يستعد لتصوير أحدث أعماله السينمائية الجديدة بعنوان تاج، بالتعاون مع الفنانة ساندي، مضيفًا: الفنانة ساندي هتشارك معانا في فيلم تاج، وهتظهر بشكل مختلف، ودور جديد عليها، بالإضافة إلى بيومي فؤاد، والعمل من إخراج سارة وفيق.
تامر حسني: بقى عندي تاريخ كبير في الأغاني
كما تحدث تامر حسني خلال حواره عن إحيائه أغانيه القديمة مرة أخرة، من خلال حفلاته الغنائية، قائلًا: النوستاجليا مهمة، الموضوع ده مهم أوي لأن تحس إن في ناس بيبقى عندها ذكريات مع أغاني معينه لما بيسمعوها بتتعاد بيتفاعلوا معاها كأنها أول مرة يسمعوها.
وأكد تامر حسني، أن لديه تاريخ من الأعمال الفنية والغناء، معلقًا: الواحد بقى عنده تاريخ كبير من الأغاني، وبيتطلب مني أغاني كتير في الحفلات فأكيد مش هلحق أغني 90 أو 100 أغنية فبحاول بقدر الإمكان استجيب لرغابتهم من خلال الكافر.
تصدر الفنان تامر حسني محركات بحث مواقع التواصل الاجتماعي بعد إعلان الفنان أحمد التهامي بسرقة فكرته لـ فيلم تاج، والمقرر بدء تصويره خلال الفترة المقبلة.
فيلم تاج ليس الأول المتهم تامر حسني بسرقته
الفنان حمادة هلال اتهم الفنان تامر حسني بسرقة أغنية عيش بشوقك والتي طُرحت عام 2018 وتجاوزت 140 مليون مشاهدة عبر موقع الفيديوهات يوتيوب.
وكان حمادة هلال تحدث عن هذا الأمر خلال تصريحات تليفزيونية سابقة، إذ قال: عيش بشوقك غنوتي وقعدت أشتغل عليها 6 شهور، وتعبت فيها والمؤلف والملحن عارفين كويس، وانشغلت بمرض أمي ولما لمدة أسبوعين تلاتة رجعت أقولهم يلا يا جماعة نسجلها لاقيت الأغنية راحت في حته تانية.
وأردف حمادة هلال: قولتلهم دي غنوتي ودي بتاعتي وحقي، واكتشفت أن بعد 15 يوم إنها بقت مع حد تاني، واللي زعلني إني كلمتهم وقولتلهم الأغنية دي بتاعتي وكنت ممكن أزعّل اللي خدوها وأنزلها على السوشيال ميديا ومرضتش أعمل كدا.
وأردف حمادة هلال: كنت فرحان بالأغنية دي، والشيطان كان بيقولي نزلها ودي بتاعتك ودي مجهودك، ولكن سلمت أمري لله، وقولت لا خلاص، وبعدها ربنا كرمني بـ أغنية تعالى اشرب شاي وكسرت الدنيا وكان فيها خير.
وأردف حمادة هلال: أنا مش زعلان أن الأغنية راحت لحد تاني، بس أنا لو حد جه قالي الأغنية دي بتاعتي هقوله خدها وطظ في 100 أغنية، إنما قالي أنت مخدتش تنازل منهم، بس احنا في جدعنة الشغلانة بنعتمد قانون الكلمة مش تنازل وورق.
وأنهى حديثه بـ: أنا كلمت الزميل والمنتج وقولتلهم الأغنية دي بتاعتي وأنا بقالي 15 يوم قاعد تحت رجل أمي والأغنية دي أنا شقيان فيها ومردتش أزعل حد ومردتش أحرق دمهم عشان ربنا مايحرقش دمي، وأنا استعوضت ربنا وربنا عوضني، ومكنش فارق معايا الغنوة كان فارق معايا أشخاص.
للمرة الثانية تامر حسني متهم في سرقة فيلم تاج
أعلن الفنان أحمد التهامي عبر حسابه الشخصي فيس بوك، أن فيلم تاج والمقرر أن يقوم ببطولته الفنان تامر حسني مسروق، وأن فكرة العمل خاصه به وموثقة في الشهر العقاري، حيث علق التهامي: قولت كل شيء نصيب والحمد لله على حب الناس والدنيا مستورة والحمدلله، إنما توصل إن مشروعي مشروع عمري اللي أنا تعبت فيه كتبته ولفيت بيه على معظم شركات الإنتاج، ولسة عندي يقين وإيمان بالله إن هييجي يوم وأعمله، يتسرق مني ويعمله حد تاني؟.
أحمد التهامي يلمح لـ عدم معرفة تامر حسني بهذه السرقة
وأضاف الفنان أحمد التهامي، أنا أول واحد من 10 سنين فكرت في فكرة البطل الخارق وطول الفترة دي كان يتسرق أجزاء من الفيلم وأقول عادي، إنما التوأم الخارق، ده بتاعي ومسجله في المصنفات والشهر العقاري.
وأردف قائلا: تامر حسني صاحبي وأخويا وأكيد ما يعرفش المعلومة دي أرجو الرسالة توصله لأن أكيد فيه ناس كتير مؤذية، وحسبي الله ونعم الوكيل، أنا حاولت أوصل لتامر حسني ومعرفتش.
