الفنان شريف إدريس
أعلن الفنان شريف إدريس وفاة والده، منذ قليل، معربًا عن حزنه لرحيل والده عن دنيانا وفراقه، ولم يكشف حتى الآن، أي تفاصيل بشأن موعد ومكان الجنازة.
واكتفى شريف إدريس بإعلان وفاة والده، عبر حسابه الشخصي على موقع التواصل الاجتماعي، فيسبوك: إنا لله وإنا إليه راجعون.. أبويا مات.
أعمال شريف إدريس
يعد فيلم النهاردة يوم جميل، هو آخر أعمال شريف إدريس الفنية، والذي شارك به مع الفنان باسم سمرة، هنا شيحة، أحمد وفيق، انتصار، نجلاء بدر، محمد حكيم، محمود الليثي، كريم كوجاك، رمزي العدل، نورهان غزي، إيمي سلام، ألف عمر، بدر صبري، محمد فرغلي، شريف مندور، أماني فتحي، محدي توفيق، محمود بيومي، والفيلم من تأليف وإخراج نيفين شلبي.
ودارت أحداث فيلم النهاردة يوم جميل حول مجموعة من القصص المتشابكة عن علاقة الرجل بالمرأة، ويطرح العديد من القضايا مثل انعدام التفاهم بين الأزواج والاغتصاب الزوجي وتأثيره، بجانب تأخر سن الزواج.
اعتزال شريف إدريس
جدير بالذكر، أن شريف إدريس أثار جدلًا واسعًا خلال العام الماضي، بعد إعلانه الاعتزال، والابتعاد عن المجال الفني، بعد معاناته به لما يقرب من 35 عامًا، موضحًا أن من أسباب اعتزاله هو إحساسه بالشحاذة للعمل، وأن الوضع أصبح عبثيًا، ما يؤدي إلى عدم وجود دخل ثابت لأي فنان، ولكن استطاع الفنان أشرف عبد الباقي مساعدته وإعادته للفن مرة أخرى، عندما استعان به في العرض المسرحي العيد فرحة، التي عُرضت أمام الرئيس عبد الفتاح السيسي في إحدى الاحتفاليات.
«بحلم إني بقتل عيالي».. شريف إدريس يعلن اعتزاله الفن نهائيًا
أعلن الفنان شريف إدريس اعتزاله الفن، وبحثه عن فرصة عمل خارج مصر، بسبب الظروف المادية التي يمر بها لعدم طلبه في أي أعمال فنية، وحاجته إلى المال ليربي أبنائه.
وقال شريف إدريس في منشور عبر حسابه الشخصي على موقع التواصل الاجتماعي «فيس بوك»، الخميس، إنه «بسم الله الرحمن الرحيم.. بعد ٣٥ سنة سعي وتعب وشقى في الوسط الفني قررت الاعتزال والابتعاد تماما وتغيير مسار حياتي، وأي حد عنده فرصة سفر ليا هاكون شاكر ليه وده طلبي الوحيد».
وأوضح شريف إدريس سبب اعتزاله قائلا: «ده قرار أخدته بعد ما الأمور وصلت في الوسط الفني لمرحلة عبثية، وصلت إني بقيت بشوف بعض الزملاء بيشحتو الشغل علني علشان يشتغلو لأن الشغل بقي متقسم على ناس معينة، فلو الأمور وصلت لكده أبعد أحسن».
وتابع الفنان المصري في منشوره: «حتي لما بيجي شغل بيتفرض عليك توافق بأقل الفلوس وتخرج من الشغل مديون، ومواقف مهينة زي إن شركة إنتاج تعرض عليك أجر هو قيمة ربع أجرك، والسبب إن الميزانية مصروفة على الديكور، طب خلو الديكور يمثل».
وروى إدريس أحد المواقف التي تعرض لها وكانت من ضمن أسباب قراره بالاعتزال قائلا: «هحكيلكم موقف حصل معايا من أسبوع، اتصل بيا حد قالي عايزين حضرتك بكرة عندك تصوير في مسلسل كذا بس هتدفع عشرة في الميه لـ»الكاستينج دايركتور«، كان هيجيلي جلطة بعد ماقفلت المكالمة، ووافقت علشان أنا محتاج اشتغل ومحتاج فلوس، وماقدرتش استوعب الفكرة بصراحة إني بعد العمر ده مضطر ادفع علشان أشتغل فاتصلت واعتذرت».
واستطرد شريف إدريس: «ده الحال حاليا.. إن الأمور بقت في إيد»كاستينج دايركتور«، وده موقف من مواقف كتير مريت بيها لو حكيتها محتاجة كتاب مش بوست على الفيس».
وواصل: «طالما الشغل بقى لازم يتدفعله، وطالما الشغل بقى بالشحاتة، يبقي بلاش أحسن، أنا طول عمري راضي الحمد لله، بس حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي، لأني وصلت لمرحلة نفسية ومادية إني بقيت مش قادر أربيهم ولا أصرف عليهم، وانا عندي تلات أطفال بعبدهم عبادة، متخيلين حجم المسؤلية، وبقيت مديون لطوب الأرض».
ووجه شريف إدريس رسالة للجمهور قائلا: «حقيقي لو حد عنده فرصة سفر ليا هاكون شاكر ليه جدًا وهيكون جميل في رقبتي لحد ما أموت، لأن حقيقي أنا مش قادر أعيش في البلد دي تاني، أنا حاولت أسعي في أي مجال تاني بس ماقدرتش، وحقيقي لو اتعرض عليا بطولات بعد البوست ده هرفضها، لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله على كل شئ».
وأشار الممثل المصري إلى: «همسح أبلكيشن فيسبوك من تليفوني، لأني هنزل أبيع تليفوني أصلا، فأنا هكون متاح أونلاين لحد بالليل، لو حد عنده فرصة شغل وسفر ليا ومش معاه رقمي ياريت يجيبه من أي حد».
وختم شريف إدريس منشوره قائلا: «أنا مش محتاج طبطبة من حد، أنا محتاج فرصة سفر وشغل تخليني أعيش ولادي حياة كريمة وبس.. شكرا ليكم محبتي للجميع.. هاين عليا أقوم أرمي نفسي من البلكونة بعد ماوصلت إني أكتب البوست ده».
