كتبت: ياسمين ياسر
وجهت الإعلامية ياسمين عز، نصيحة للمطربة العالمية شاكيرا، بعد انفصالها عن لاعب الكرة الإسباني المعتزل حديثًا جيرار بيكيه.
وقالت «عز» خلال حلقة برنامجها «كلام الناس»، اليوم الجمعة والذي يعرض عبر قناة «إم بي سي مصر»، إن شاكيرا لا تتوقف عن «التلقيح» على بيكيه، ومؤخرًا أصدرت أغنية جديدة لهذا الهدف.
وأضافت «أنا مقدره وجعها، شاكيرا نجمة النجوم وعندها معجبين من العالم كله، بس الست ست مهما كانت هي مين أو معاها إيه، التلقيح أحيانًا بيكون شكل من أشكال الوجع والألم والندم على الانفصال».
وتابعت «عز»: «أنا ليا أكتر من عتاب على شاكيرا، أنتوا خلاص سيبتوا بعض خلاص سواء إنتي الغلطانة أو هو الغلطان، ولادكم ملهمش ذنب تبقى سيرة أبوهم وأمهم على لسان الناس كل يوم، مينفعش ساشا ابنك الصغير يروح مدرسته الصبح وزمايله يتريقوا عليه ويقولوا يلا يالي مامتك بتقول على باباك كذا كذا في الأغنية».
وأكملت: «إنتي وقت الانفصال قلتي إحنا انفصلنا عشان مصلحة ولادنا، فهل من مصلحتهم يبقى العالم كله بيتكلم على أبوهم بالطريقة دي، ولا عشان الراجل ساكت تفضلي تلقحي عليه وتهاجميه في الرايحة والجاية، النهايات أخلاق يا شاكيرا، مش كده، الراجل عشرة وعيش وملح 12 سنة».
