كتبت: ياسمين ياسر
تحدثت الإعلامية ياسمين عز، عن أهمية احترام الزوج، مؤكدة أن جدها كان معمرًا في الأرض بسبب معاملة زوجته له، كما وجهت عددًا من النصائح للزوجات.
وقالت ياسمين عز في برنامجها كلام الناس: أنا جدي مات عنده 98 سنة، كان معمر في الأرض وبسبب جدتي كانت بتعامله معاملة طولت عمره وكان فاضله سنتين ويقفل قرن، لو قولتلكم جدتي كانت بتقوله إيه هتموتوا مني، والحمد لله إن جدتي ماتت ومشافتش حفيدتها في العصر الحديث عايشة مع الناس اللي بتقول محمد بدون ألقاب.
وأضافت ياسمين عز: معظم الستات كان عاجبهم الاقتراح ونفذوه والنهاردة بقينا نسمع يا أستاذ محمد وأستاذ كريم وإن شاء الله هينتشر أكتر، ولكن فيه بعض من السيدات مكنش عاجبهم الكلام، طيب هو أنا غلطت علشان عايزاكم تقدروا بعض؟ ما أهلنا زمان كانوا بيعملوا كده ومكنش فيه طلاق والحياة كانت جميلة، البيت لما يكون محترم بينعكس على الشارع والمدرسة والمجتمع بأكمله.
وواصلت ياسمين عز: ابنك لما يسمعك بتقولي لجوزك يا أستاذ هيحترم اللي في الشارع، وبعد كده هنسمع مصطلحات يا أستاذ ويا أفندم ولو سمحت في الشارع، بدل ما بنسمع مصطلحات منجرؤش نقولها زي أنجز وفي إيه، فين درس احترام الكبير والعطف على الصغير اللي درسناه أول ما بدأنا ندرس؟
نصائح لاحترام الزوج
وسبق ووجهت ياسمين عز نصائح لاحترام الزوج، وقالت في تصريحات تلفزيونية سابقة: ليه بتنادي على زوجك بدون ألقاب؟ وليه بتاكلي أخر حرف من اسمه؟ لازم تقولي له يا أستاذ محمد.
